香港新浪網 MySinaBlog
« 上一篇 | 下一篇 »
麥don鴻 | 21st Jun 2011, 23:05 PM | 麥DON鴻十大系列 | (1023 Reads)

小弟都有成個幾月無寫過BLOG喇! 不過而家有咁多電影BLOG可以睇...........所以我就算成世唔寫,相信大家都唔會覺得有咩可惜架喇! 呵呵!!!

小弟呢個"十大系列"環節,簡單D講就係每次從唔同嘅戲種中,挑選自己心目中嘅十大最愛之選。當然呢D所謂十大之選,全部都係本人嘅個人意見同分享,絕對係唔代表閣下之意見(簡單D講,即係我LIKE睇乜關你撚事),亦唔係同嗰D自命係專家嘅人鬥專業。所以如果閣下對小弟嘅十大之選有咩不滿的話,可以即刻過主,不喜就勿看,尊重他人,懇請各位專家自律!!!

 

 

今次嘅"十大系列",會同大家分享下小弟LIKE睇邊D喜劇,其實我睇戲就好撚易笑嘅,所以講爛片都可以當喜劇睇,但究竟當中有邊十套,係麥DON鴻嘅心水之選呢? 大家睇完咪知囉! 睇下我嘅十大之選同大家又一唔一樣喇!

 

第10位 - "廟街十三妹"(1993)

係....................大家絕對無睇錯,真係"廟街十三妹",點解一套爛片都可以入到十大咁撚神奇? 好撚簡單,因為呢套係每一個角色、對白、場景、動作都充撚滿喜劇效果,導演又唔係拍緊笑片............係拍緊動作片,但成套戲嘅爆笑指數,已經永久超越晒周星馳D戲,實在百年難得一見嘅奇片,所以梗係要入圍啦! 呵呵!!!

 

第9位 - "92黑玫瑰對黑玫瑰"(1992)

懷舊喜劇經典

 

第8位 - "水滸笑傳"(1993)

雖然呢套戲D卡士,少過"花田囍事"好多,不過一個毛舜筠加達哥,已經夠撐起成套戲...............勁!!!

 

第7位 - "家有囍事"(1991)

好坦白講,小弟係睇周星馳D戲大嘅,佢D戲點能夠唔入圍呢? 但係周星馳有好多戲,都一定要有吳孟達先特別好笑,一無咗達哥,星爺D戲往往喜劇感減半..........所以小弟就揀咗呢套"家有囍事",因為呢套戲就算無咗達哥,成套戲都仲係非常好笑,同埋星爺就算係呢套群戲為主嘅電影入面,都依然突出.............同埋呢套戲咁經典,點可以唔入圍呀!

 

第6位 - "東成西就"(1993)

小弟一向好LIKE睇,一D由好多演員合演嘅喜劇,因為我一直覺得,一套喜劇入面,永遠只有一兩個演員演得好笑,嗰D喜劇永遠唔會耐睇,因為純個人表演嘅喜劇模式,過咗一段時間就會覺得OUT。但係如果一套喜劇,有好多唔同演員演出,就會有好多唔同嘅演繹效果,咁樣成套戲就會變得立體,唔係一個個人表演...............好似呢套戲咁,有咁多大星肯去演一套胡鬧兼無聊到極點嘅喜劇,仲要係幾好笑.............梗係要入圍啦!!!

 

第5位 - "賭神2"(1994)

小弟個人意見覺得,呢套係最好嘅王晶式動作劇情式喜劇,不過都係以前嘅事喇!!!

 

第4位 -"表姐,妳好嘢!續集"(1991)

小弟個人意見認為,第二集比第一集好笑好多................呵呵!!!

 

第3位 -"小小小警察"(1989)

呢套戲入圍嘅原因,我諗你哋唔撚使問卦?

 

第2位 -"谷爆"(1978)

呢套戲能夠入到第二位嘅原因,請大家睇返條LINK嘅舊文,就會明撚晒架喇!

http://hk.myblog.yahoo.com/donnymak7626/article?mid=5014

 

.

.

.

.

.

.

 

 

第1位 -"芝士火腿"(1993)

睇到呢個第1位,可能好多BLOG友會屌,點解十大中,竟然無周星馳擔正嘅戲? 同埋點解連喜劇之霸許冠文都無.............其實小弟睇喜劇,除咗要令我笑得出之外,演員嘅演繹都好重要。午

某程度上睇周星馳嘅當紅時喜劇,佢嘅演繹根本就係照DUP許冠文,不過就講多幾句粗口嬉皮笑臉D咁解,可以講許冠文後生時咁嘅演繹,你都會笑。星爺以前嘅喜劇好笑,係因為個劇本本身已經好笑,王晶同李力持其實功勞都唔少,達哥更加係靈魂之一,星爺嘅演繹只係輔助而已,同埋周生嘅喜劇人物,不嬲都太過英雄化,太撚型喇! 好老實,我唔太受一個會搞笑嘅英雄人物..............我覺得搞笑角色都係市井D、親民D、賤D仲好。

所以我揀"芝士火腿",我知好多人,都唔太LIKE未拍"西遊記"前嘅張衛健,話佢扮撚晒星爺之餘,又浮誇到冚家剷,不過我就超LIKE佢冚家剷,因為佢嘅演繹真係夠晒市井,講嘢夠撚晒賤.............可以講佢嘅演繹真係超自然,我亦超LIKE,但係之後佢拍返電視劇,又係做搞笑英雄人物,我就覺得佢好撚扮嘢喇! 所以"谷爆"可以入第2位,就係因為角色夠市井草根,我唔需要一個飛虎隊精英,喺度扮撚晒型搞爛GAG囉!

 

 

咁你嘅心目中十大喜劇又係邊幾套? 仲唔快D搵劉賢分享你嘅十大之選!?

 

 

 

 

 

PS: 以上嘅十大之選,全屬小弟個人意見,總之大家有不滿就勿看,想分享自己嘅十大之選,小弟係絕對歡迎,想搞事扮專家就請過主喇!


[11]

Yeah!比我估中左第一位係"芝士火腿"!
don兄講得o岩張偉健響里套戲真係賤得黎好很抵死搞笑,曾志偉都好正! 我尤其鍾意性教育果場戲同埋首主題曲"包出氣"!


[引用] | 作者 Ching Ki Choi | 24th Jun 2011 23:38 PM | [舉報垃圾留言]

[10]

突然記起套雞同鴨講,都好好笑,又勵志,又有溫情


[引用] | 作者 Jessie | 22nd Jun 2011 09:28 AM | [舉報垃圾留言]

[9]

以下四套我鍾意的喜劇,睇吓中唔中你的第一位:
猛鬼大廈,逃學威龍,整蠱專家,志在出位

而根據你的口味選,會不會是'貓頭鷹'或"國產凌凌漆"?


[引用] | 作者 醒波 | 20th Jun 2011 21:32 PM | [舉報垃圾留言]

[8]

突然諗起一套自己覺得好攪笑o既戲 - 我愛夜來香。 唔知有冇機會拿冠軍呢?


[引用] | 作者 Andeon | 15th Jun 2011 22:12 PM | [舉報垃圾留言]

[7]

家有喜事蘭子同毛毛好笑d


[引用] | 作者 !? | 15th Jun 2011 02:52 AM | [舉報垃圾留言]

[6]

我估冷門d, 第一位係"芝士火腿"or"志在出位"!


[引用] | 作者 Ching Ki Choi | 14th Jun 2011 23:26 PM | [舉報垃圾留言]

[5]

第一名唔通係許冠文ge戲?

亦希望Don鴻兄將來可以分享心目中十大喜劇演員。


[引用] | 作者 Jacque Foo | 14th Jun 2011 16:58 PM | [舉報垃圾留言]

[4]

喜劇////
第一套諗到既就係家有囍事// :)))


[引用] | 作者 Wythe Li | 14th Jun 2011 12:20 PM | [舉報垃圾留言]

[3]

一時間估唔到邊套會第一添...
第2-10位,睇過其實中幾套,有o的真係次次睇都笑到肚痛 (e.g. 小小小警察)


[引用] | 作者 Andeon | 14th Jun 2011 10:47 AM | [舉報垃圾留言]

[2]

很期待第一位!但不知為何《家有囍事》周星馳那條線是三條線中我最不喜歡的呢,真奇怪。


[引用] | 作者 Calvin Chiang | 14th Jun 2011 09:46 AM | [舉報垃圾留言]

Next