香港新浪網 MySinaBlog
« 上一篇 | 下一篇 »
麥don鴻 | 12th Mar 2011, 11:40 AM | 每DON睇碟時 | (423 Reads)

其實"每DON睇碟時",除咗會介紹小弟覺得靚嘅圖案碟之外,一D出面比較難搵嘅戲,如果我有碟喺手的話,都會同大家分享一下。今次要分享嘅碟,唔係一隻,係一套,仲要係成套19幾隻添.................係咩系列!? 咪就係"陰陽路"系列囉!!!

-------------------------------------------------------------------------------------------------

"每don睇碟時"主要係分享一d小弟覺得靚嘅舊VCD彩圖/圖案碟,因為小弟對以前出版嘅舊VCD彩圖/圖案碟情有獨種,所以特意同大家分享一下。另外,小弟亦會講一d關於碟同發行商嘅小知識。不過由於主要係講靚嘅彩圖碟關係,一d影碟發行商嘅碟可能唔會介紹(如:富城、威業、樂貿、珠城同飛圖二友),因為呢d發行商d碟面一向出名製作簡陋,只係佢哋發行多一d絕版戲咁解,因為我呢個專題主要係講彩圖/圖案碟,唔係講絕版碟,所以呢d發行商嘅碟就唔會多介紹(按當時標題講咩而定)。

-------------------------------------------------------------------------------------------------

相信唔少人都應該有睇過"陰陽路"系列架喇! 但有幾多人真係睇晒,又或者儲晒成套19隻"陰陽路"? 咁就真係唔撚知喇! 小弟都用咗成個幾月時間,先儲得齊成套"陰陽路"VCD,本來都想儲DVD,不過成套獨欠第2集"我在你左右"係無出過DVD,既然都唔會儲得齊成套DVD,再加上往後嗰幾集,根本唔值得儲DVD,所以不如儲VCD算啦!

頭4集"陰陽路",相信大家就算無碟喺手,睇TVB又或者嗰D乜乜電影台,我諗你哋都已經睇過百九幾次或上..............頭4集中,小弟最愛第4集,因為黎耀祥斬手指掟鬼一幕真係好撚好笑,兼印象深刻,同埋CULT到連喪屍都玩埋,真係算比之前3集係用腦扭下橋架喇!!!

PS: 第1、3、4集,而家喺出面嘅二手碟舖都仲可以輕易咁搵到,但第2集"陰陽路之我在你左右",因版權問題,已經成為絕版,雖然個價暫時仲未炒得起,平均二手都只係十幾蚊隻,不過唔算易搵,搵唔搵到就要睇彩數喇!!!

第5-8集,相信大家可能會對第6集"凶周刊"印象深D,不過我就對第5集嘅"一見發財",因為呢集溫情得嚟,劇情亦算吸引,雖然唔算好恐怖,但19集"陰陽路"中,小弟亦係最LIKE呢集,呢集亦係首次由中大電影投資,之前頭4集分別由彩業(1)、永盛(2-3)同東方(4)投資,第6集就由潤萬投資,不論大小公司,都對"陰陽路"呢舊肥豬肉虎視眈眈,因為本小利大,又有唔紅拍到紅嘅古天樂撐場,所以總有D吸引力嘅............古天樂拍完第7集,由南燕自資出品嘅"撞到正"之後,就永久離隊。由第8集開始,改由中大電影公司投資,之後就改為電視電影式製作,自此"陰陽路"打從第8集開始,就成為爛片嘅代名詞....................直到永遠!!!

第9-19集,相信未必人人睇過,因為我好相信,好多人都俾D"強大"卡士嚇撚死,除咗羅蘭同雷宇揚間中幾集撐場,其他都係搵D電視星仔,又或者D新人奀星擔正,可以講真係睇見D卡士就反胃,莫講話要睇啦! 加上套套DV拍攝,真係唔係人人都頂得順。雖然咁差,但小弟都有3套可以推介下嘅............分別就係第14集嘅"雙鬼拍門"、第15集嘅"客似魂來"同埋第16集嘅"回到武俠時代",點解推介呢3集? 因為除咗呢3集嘅故事肯有d創新之外(點樣創新? 就要大家自己搵嚟睇下就知架喇),演員陣容亦加咗D新面孔,如施明、曾志偉、鍾鎮濤、梁漢文同藍潔瑛,雖然呢D唔算係D咩超強卡士,不過比起下下睇唐家輝、張豪龍、鬼塚、九紋龍名陳穎妍.............咁你哋話邊D卡士大D喇!!!

PS: 其實由第6集開始,至到第19集,而家喺好多碟舖,都仲可能間中買到一手嘅VCD / DVD,但可唔可以喺一間舖內買齊,當然就有D難度啦!!!

 

如果大家再想聽多D,我點講其他港產鬼片同"陰陽路"系列,可以聽返小弟之前主持嘅網台節目"電影大時代"第七集"搞鬼大時代".................有興趣就支持聽下啦!!!

http://www.pooopup.com/radio.html

 

 

 

以上資料可能有誤,想知更多詳細資料,就請自行再search

 

 

 

PS: 唔知經過今次小弟介紹之後,會唔會令大家重燃要儲齊成套"陰陽路"嘅殘念呢? 呵呵!!!


[5]

Very miss 藍潔瑛....


[引用] | 作者 Jacque Foo | 4th Apr 2011 23:53 PM | [舉報垃圾留言]

[4]

睇Don兄介紹9-19集,令我諗起小馬哥系列...


[引用] | 作者 Andeon | 17th Mar 2011 23:57 PM | [舉報垃圾留言]

[3]

我只係中意頭三集,其餘都唔太中意...


[引用] | 作者 kaylee | 13th Mar 2011 00:16 AM | [舉報垃圾留言]

[2]

回到武俠時代
.. 好似忽然間好跳TONE咁...:S


[引用] | 作者 Wythe Li | 12th Mar 2011 17:12 PM | [舉報垃圾留言]

[1]

回到武俠時代好似好得咁wor, 對碼?? (我睇果封面估ja)


[引用] | 作者 teddy chan | 12th Mar 2011 09:46 AM | [舉報垃圾留言]