香港新浪網 MySinaBlog
« 上一篇 | 下一篇 »
麥don鴻 | 22nd Oct 2010, 01:50 AM | 史老闆把鬼推介 | (854 Reads)

上回講到..........請睇返"史老闆把鬼推介 - 腦魔 (1-4)"

 

I COME BACK..................COME BACK...................各位好! 大家無聽錯,我並唔係史老闆,我係腦魔................根據TVB近年D好撚收得嘅劇集為例,只要套劇收得,結局嗰集一定會安排D劇中演員,扮懶晒親民同D市民迫埋喺一個商場仔度,一齊睇大結局與眾同樂..................有見今次"腦魔"自POST以來,反應都相當唔錯,大家仲對我嘅遭遇非常同情,不過我始終都難逃一死,所以嚟緊喺呢個結局篇度,我腦魔都會做大家嘅旁白導航一齊睇大結局。如果大家都想知仆街彬會唔會做我陪葬品? 咁真係要捕實上下兩部嘅結局篇喇! 仲有想睇足本結局篇嘅BLOG友,快D加入麥DON鴻喺FB嘅"DON紅世家"專頁喇! 因為麥DON鴻話過,如果今次上下兩部結局篇,是但一邊累積有50個留言的話(但另一邊BLOG,不得少過25個留言),就會將結局篇放喺專頁度俾各位欣賞,如果唔知條LINK嘅,就自行喺個BLOG入面度搵啦! 好....................唔阻大家睇戲,我就嚟死期到喇!

 

有一日仆街彬揸車出街,我已經顯晒靈撚晒D幻象出嚟(想知咩幻象?就梗係睇套戲啦),想搞到佢撞車死撚咗就算鳩數......................

架車唔受控制期間,前面有條友突然攝出嚟.....................

仆街彬撞到人,仲話個老嘢發雞盲,見有車都唔識閃,十成係撞鬼咁話................點知個老嘢話仆街彬個樣先似撞鬼......................(唔係話我吓話)

跟住個老嘢仲係都要睇仆街彬隻手,仆街彬當然無撚SO佢,仲開車走撚咗添,之後個老嘢仲話亞彬一定會返嚟搵佢.........................(我死梗喇)

 

跟住仆街彬返到屋企,就終於輪到ANNIE瀨嘢喇! 不過今次就唔關我事嘞!

亞彬一返到屋企,就見到ANNIE掉晒D化妝品,ANNIE話而家唔鍾意化妝................

跟住ANNIE就不滿餐餐都多肉少菜,除咗日日都要飲胚哥好立克之外,仲要日日食齋..........................

跟住夜晚,亞彬想同ANNIE交合下,點知ANNIE唔撚俾佢鍚....................

亞彬再鍚多幾鍚,ANNIE仲發晒青光咁嚇鳩亞彬,仲突然有把老牛聲話咪撚搞佢..............

跟住亞彬再問ANNIE咩事? ANNIE話而家咩都唔鍾意.................咁有緣無慾,又真係好難持續嘅...................我突然同情彬彬添....................

之後亞彬就走咗去間相熟酒吧度飲悶酒,仲同個酒保講佢今日一連串不愉快經歷,個酒保聽完亞彬咁講,就話佢老婆十成俾嘢入咗舍,仲話佢識得有個法師好撚勁,一定可以幫到亞彬添...................究竟ANNIE係咪真係俾四面佛上咗身呢?

亞彬終於都搵到個傳聞好撚勁嘅法師喇! 不過個法師啱啱幫緊兩母仔解降,想知解咩降就睇戲啦! 我唔嘥時間講喇!!!

相信大家都知個法師,就係之前俾亞彬用車撞嘅老嘢喇! 個老嘢一見到仆街彬就話佢知瀨咗嘢!!!

亞彬係咁易敷愆下件老嘢就想走.......................

個老嘢即時用天下第一拳打咗亞彬幾嘢,搞到亞彬最後都投降俾老嘢幫佢作法............

個老嘢原來想作法迫我出嚟................

就算亞彬只係嘔咗我少少出嚟................

我都有能本事變到成塊免治牛咁....................都咪話唔勁....................

不過個老嘢仲勁,一招噴火一陽指我就無咗,不過我咁勁,當然無事啦!!!

個老嘢真係勁,一睇就知仆街彬係中咗我千年彊屍毒嘅邪氣,我相信連只識睇人卦山嘅承承師傅都未必睇得出....................

亞彬見老嘢咁勁,就問係咪已經清晒D邪氣,跟住個老嘢話未清得晒,不過佢叫亞彬放心,因為佢仲有靈符壓鎮.................究竟個老嘢D符鎮唔鎮得住我?

究竟四面佛現埋真身又消唔消滅到我呢?

PS: 其實四面佛之前上ANNIE身,係想保護ANNIE免受腦魔入侵,佢今次因為FEEL到腦魔殺到嚟,所以先現真身。不過個四面佛造型又真係削咗D,如果想睇埋佛祖現真身,就要睇條片喇!!!

究竟我會點死呢?

究竟亞彬無咗個腦又死唔死得?

咁就劇終.................拜拜!!!

PS: 咁多嘢想知? 梗係睇足本結局啦! 去邊度睇? 唔係仲要問吓嘩!!!

 

 

 

 

 

 

 

 

注意: 以下部份內容,只係小弟個人意見,有部份資料喺未經證實,所以只供參考,敬請各位blog友留意!!! 另外,對小弟文筆不滿之BLOG友,不喜可以勿看,但切勿留言作過份抨擊,懇請自律!!!

 

磨咗差唔多成個月,終於都埋尾喇! 好多謝曾經由頭追到尾嘅BLOG友,大家唔好睇今次只係得5篇POST就磨成個月,其實今次小弟首創分上下兩部份POST,以每部份20張圖計,即係如果分開嚟計嘅話,今次"腦魔"其實係有9集咁多架! 不過為咗等大家睇得緊湊D之餘,又順便強迫大家搵多D劉賢,所以先用呢個方式出POST,希望大家唔好介意,不過就算你哋真係介意,我都唔會理架喇! 禮貌上係咁講啫!!!

例牌客氣說話就講完,等小弟係咁易都講下D感想啦! 其實呢套1983年嘅"腦魔",係由羅烈做導演同監製再做埋出品人嘅作品(雖然出品人係出佢老婆唐嘉麗個名,不過相信都應該係掛名居多),絕對係自家製作。雖然睇得出套戲成本有限,但睇得出套戲嘅劇本明顯係有用腦度過,絕對唔會好似"車魂"咁,一味堆砌亂咁嚟。

其實"腦魔"入面有4點我係幾欣賞嘅,不如又同大家扮下D屎忽專家吹下啦!

(1) 戲中交代腦魔要殺亞彬家姐同ANNIE大佬時,都一定會交代亞彬喺門外做出一D想報仇嘅奸狗表情,其實呢D表情就咁睇好似幾多餘,但實際上都留咗一D思考空間俾觀眾,就係究竟係腦魔自作主張,自己自動波去殺睇唔起主人(亞彬)嘅敵人,定係其實腦魔一早已經控制亞彬,已經一早二合為一,係只要亞彬唔LIKE嘅人,腦魔都會安排他死去..............點解我會咁講? 大家有睇過結局條片嘅BLOG友,都應該知亞彬最後係無咗個腦架喇! 但其實腦魔個腦,係咪就係亞彬個腦? (因為腦魔被消滅,所以亞彬就無咗個腦) 呢點故事並無好明確交代,純粹等大家個腦可以諗下嘢,其實我幾LIKE呢種估估下嘅ENDING形式嘅。

(2) 陳觀泰話晒都算喺當時嘅巨星級人馬,難得佢又肯做呢個仆街彬角色,仲做得入型入格,令原本應該係奸嘅腦魔,反而得到唔少同情票,腦魔最後要殺亞彬,都係同自衛殺人一樣道理,如果唔係亞彬仆街在先,可能結果唔會係咁都唔出奇。呢個設定其實同"車魂"都好似,不過拍出嚟就爭好撚遠喇!!!

(3) 80年代好多鬼片降頭片,都一定要少少鹽花助下慶,就算無床上戲,都例整D裸女解降戲,等D男觀眾開心下,但呢套戲竟然完全無鹽花,令套戲少咗無聊劇情而變得緊湊,咁嘅安排真係值得一讚。

(4) 最尾四面佛同佛祖現真身嘅劇情,雖然兩位嘅真身造型就流咗D,不過有神來之筆之餘,都仲有D笑位笑下,其實都算係咁架喇!!!

 

總括嚟講"腦魔"個劇本其實簡單得可憐,好多地方都有反駁之處,個彊屍腦同腦魔人造型,都因為成本有限,所以都變得粗糙,但論整體其實都算唔錯,悶場亦唔算多。雖然套戲整體唔算十分正,不過未睇過嘅,其實真係一睇無妨,無須珍藏嘅....................呵呵!!!


[31]

無腦都仲可以生存到? 勁?

個故仔單線發展應該係緊湊D!


[引用] | 作者 Petvin Ma | 21st Oct 2010 21:36 PM | [舉報垃圾留言]

[30]

好想睇下無腦o既阿彬會係點樣....


[引用] | 作者 Andeon | 21st Oct 2010 14:27 PM | [舉報垃圾留言]

[29]

到底沒腦的人會變成怎樣呢?很想看結局啊。


[引用] | 作者 Calvin Chiang | 20th Oct 2010 22:28 PM | [舉報垃圾留言]

[28]

腦魔個腦,係咪就係亞彬個腦?


[引用] | 作者 Shanghai bunny | 20th Oct 2010 18:27 PM | [舉報垃圾留言]

[27]

真係無鹽~~~


[引用] | 作者 Matthew Tse | 20th Oct 2010 18:26 PM | [舉報垃圾留言]

[26]

撞鬼囉, 最後一幕都要咁fresh!

真係好想知無主角冇左個腦會點呀!


[引用] | 作者 多樂同學 Carmen | 20th Oct 2010 14:18 PM | [舉報垃圾留言]

[25]

個四面神好似雙子座黃金聖鬥士


[引用] | 作者 faister | 20th Oct 2010 10:13 AM | [舉報垃圾留言]

[24]

四面神好似頭大身細


[引用] | 作者 Paul Ip | 20th Oct 2010 08:15 AM | [舉報垃圾留言]

[23]

咪玩野, 腦魔都無手指, 點識寫blog!


[引用] | 作者 Louis Lin | 20th Oct 2010 02:48 AM | [舉報垃圾留言]

[22]

Actually 套戲一 D 都唔悶,好搞笑, 劇情好緊湊 ar... can't wait for 終極大結局 ar.


[引用] | 作者 Jessie | 20th Oct 2010 01:29 AM | [舉報垃圾留言]

Next