香港新浪網 MySinaBlog
« 上一篇 | 下一篇 »
麥don鴻 | 6th Sep 2010, 17:10 PM | don鴻今日 | (650 Reads)

"麥don鴻決戰香港大時代"呢個BLOG名(不論有無加個新字),相信好多人都會好奇怪,點解個BLOG名會咁長咁無厘頭? 點解要叫麥don鴻? 同埋一定要用"大時代"呢套電視劇名? 相信其實無咩人想知,不過我都會強迫大家了解小弟點解要BLOG嘢................呵呵!!!

 

1Q: 點解叫做麥DON鴻?
1A: 因為小弟好LIKE麥當雄呢位電影人,亦咁啱小弟個真名,中文名就叫麥X鴻,英文名就叫DON,所以就取其諧音改為"麥DON鴻"。

 

2Q: 點解一開始會喺YAHOO度寫BLOG?
2A: 小弟未喺yahoo度開blog之前,其實都有寫開blog,不過就喺MSN入面個spaces度寫,都係寫d自家生活瑣碎嘢。本來都有諗過寫電影文章,不過我覺得spaces個版面唔好用,同人流少嘅關係,所以都無諗住寫..............直至小弟喺07年9月頭,見到前公司同事喺yahoo開咗個blog寫自家心情嘢,寫咗幾日就已經有3百幾瀏覽次數,令小弟覺得如果我都開blog寫電影嘢,相信第一日無100都有50幾瀏覽次數呱..........同埋嗰時睇好多電影blog,令自己都好想寫下,所以決定喺yahoo度開blog。

 

3Q: 咁初期有幾多瀏覽人數?
3A: 4日得3個人睇.................試過5日零人次

 

4Q: 咁少人睇有無諗過唔寫?
4A: 當然有諗過,但一諗到我個BLOG,雖然當時唔算多人睇,但都總算有一兩個知音人睇緊,所以就點都繼續寫落去。同埋我寫BLOG嘅目的,旨在同大家用另一個形式,去分享一d大家遺忘咗,又或者未睇過嘅港產片,扮唔到專家亦唔識扮專業。只係希望可以搵到知音人睇,人數多固然開心,但人數少亦唔代表無知音,最重要喺我希望寫blog可以自娛之餘,亦希望可以娛樂大家。

 

5Q: 點解會諗到"麥don鴻決戰香港大時代"呢個又長又怪嘅名?
5A: 其實當時一諗住喺yahoo度開blog,已經第一時間就諗起麥當雄,因為喺我心目中,麥當雄就係一個專出好電影嘅icon,同埋可能大家都係姓麥嘅關係,真係一諗就諗起佢,別無他選。至於"大時代"一直都係小弟最like嘅電視劇,而韋家輝亦係小弟最like嘅導演。

如果大家有睇過之前嘅"麥don鴻精選32",就知道第一同第二位,都分別為"省港旗兵"(麥當雄導演)同"一個字頭的誕生"(韋家輝導演),所以小弟個blog名,就決定用"麥don鴻"呢個諧音名,同"大時代"呢套電視劇名,去表達麥、韋二人,喺小弟心目中嘅代表性。至於"決戰香港",就只係小弟覺得順口而串連出嚟,其實無咩好特別嘅意思,只係覺得成個名講出嚟幾順之餘,又好似幾有氣勢咁解(完全個人意見)。

 

6Q: BLOG BANNER入面"大時代"嗰3隻字,係咪同電視劇入面出現嘅一樣?
6A: 大家先睇下以下兩張圖先

電視劇入面"大時代"字樣

小弟Sina Blog Banner字樣

 

基本上兩個字樣都係一樣,因為小弟係照住電視劇入面嘅"大時代"字樣,用電腦再跟住勾畫一次,然後再設計BLOG BANNER,咁做嘅原因係希望各位,一睇到"大時代"呢3隻字嘅字樣,就會即時諗起套電視劇。當然小弟亦可以搵其他字款,去取代呢個版本,不過我就覺得咁做就失去咗,原先小弟所想嘅關連意思喇!!!

 

7Q: 點解個blog入面會有咁多粗口同咁口語化?
7A: 小弟個blog一直都係用粗鄙文筆去寫港產片,除咗係本人文學修養差之外,亦希望用粗鄙低俗文筆,用另一個方式去介紹電影。小弟由細到大睇過唔少電影專欄同影評,一直都好奇怪,係咪真係要搬一大堆電影理論,再加懶斯文加扮專業文字,先可以有資格寫電影文章,唔通講粗口同文筆粗鄙低俗d就無資格寫同無人睇!? 所以我個blog,可以講係全港電影blog中最粗鄙低俗嘅..................好唔好睇就見仁見智啦!!!

至於口語化問題,我個blog既然係寫港產片,當然就梗係口語化啦!!! 因為港產片係屬於香港人,用口語化係想大家易投入一d,如果我下下用我們、的、了去寫港產片,的確可能會多d台灣同國內blog友睇,不過咁做真等同於而家d港產片,下下遷就國內市場無分別,同埋就以後都無"撚"睇喇!!! (因為成日"的的了了",都成本教科書咁,仲邊有粗口睇呀!).............我個blog唔會刻意"賣埠",所以亦唔會刻意遷就,敬請留意!!!

 

8Q: 有無D再特別嘅原因,令你一定要用"大時代"呢套劇做BLOG名不可?
8A: 點解我咁LIKE"大時代"呢套電視劇,原因係劇中有兩段對白令小弟非常深刻,就係:「如果一個人無夢想,就最好死咗佢」;「同要將自己個名成為一個代號」..............呢兩句對白,小弟都覺得非常之有意思之餘,仲覺得好有激勵作用。雖然小弟而家喺工作上都唔算得上係大成功,但總算比極上就一定嚴重不足,要比極下又有未到嗰隻...................其實小弟寫呢個BLOG都有"理想"同"夢想"嘅(其實用妄想會貼切一D),就係希望以後大家一提到"粗鄙低俗",就會即時諗起小弟之外,亦好希望大家以後一講好睇嘅電影BLOG,數到100位都希望可以數到小弟個BLOG,101位我都唔介意架................又或者只要一講電影BLOG,就會即時講得出"麥DON鴻"呢個名.................嗱!!! 妄想下咋..............唔好插我呀!!!

就係呢兩句對白,令小弟更加覺得呢套劇有意思,兩句對白就可以令小弟成為"座右銘",咁成為一個BLOG嘅BLOG名都唔係好過份姐.................最抵死我又覺得幾順口嘛................呵呵~~

 

9Q: 點解Yahoo Blog用得好地地,會突然堅決轉去Sina寫Blog,有無咩特別原因?
9A: 其實小弟寫咗YBlog 3年幾,雖然真係吸納到唔少人睇我個blog,但真係長期keep住睇小弟個blog嘅blog友,其實每日不足50個,同埋近年YBlog系統管理越嚟越差,d垃圾留言真係令我好煩厭,既然又唔係真係咁多人睇,只要真係有blog友真心支持,就算去邊個平台寫都真係無所謂,最緊要我仲願意繼續寫啫!!!

 

10Q: 點解已經有blog寫緊,仲要喺Facebook同微博寫電影嘢呢?
10A: 小弟仲Keep住用寫Blog形式去寫電影, 都係想繼續寫一d長篇介紹同爛片,不過由於用呢類形式寫blog,其實係幾花時間嘅,所以Facebook呢類平台比較啱我。因為小弟嘅Facebook基本上日日都開,同埋我就算幾忙都好,都可以盡量抽幾分鐘去POST一張相同片去分享電影,雖然梗係無長篇介紹咁好,但都好過我一D嘢都唔寫啦! 所以就算近排我Facebook成日俾人無理封AC,但我一定會重開繼續寫,因為Facebook嘅互動性始終比較強,最少留言人數有時都多過BLOG先啦! 同埋Facebook我會寫多D電影以外嘅嘢,Blog就主力寫電影。至於微博,暫時都係處於人開我又開嘅心態,暫時都唔會主力去用,不過微博嘅放相尺度,的確比Facebook鬆,係唔可以放政治嘢啫!!!

 

 

 

 

 

PS: 其實以上10條問題,都係好多BLOG友,一直私底下經常問小弟嘅。由於小弟覺得以後都仲可能會有新BLOG友,再重問以上問題。所以小弟直情開篇POST同大家解答一下,等各位BLOG友,可以對小弟個BLOG嘅來源多少少認知。如果其他BLOG友,仲有關於小弟個BLOG嘅問題想問,都可以提出嚟!!!...............不過一D含攻擊及批評性嘅問題,小弟一律唔會作答,敬請留意!!!


[15]

莫非你係麥振鴻!?


[引用] | 作者 Davily | 12th Sep 2010 21:14 PM | [舉報垃圾留言]

= =

[引用版主回覆] | 作者 麥DON鴻 | 2nd Oct 2010 23:48 PM

[14]

很好啊,我了解don兄更多了,哈哈。


[引用] | 作者 Calvin Chiang | 12th Sep 2010 18:51 PM | [舉報垃圾留言]

呵呵.....咁以後就要了解我多D喇!

[引用版主回覆] | 作者 麥DON鴻 | 2nd Oct 2010 23:48 PM

[13]

支持好港片!~~~~~~

神經刀
[引用] | 作者 神經刀 | 9th Sep 2010 18:17 PM | [舉報垃圾留言]

多謝支持!

[引用版主回覆] | 作者 麥DON鴻 | 2nd Oct 2010 23:49 PM

[12]

支持粵港文化遺產。


[引用] | 作者 Matthew Tse | 6th Sep 2010 21:05 PM | [舉報垃圾留言]

多謝支持!

[引用版主回覆] | 作者 麥DON鴻 | 2nd Oct 2010 23:50 PM

[11]

劉賢, 劉賢~~~


[引用] | 作者 Wing C | 6th Sep 2010 17:46 PM | [舉報垃圾留言]

以後多D搵佢喇!

[引用版主回覆] | 作者 麥DON鴻 | 2nd Oct 2010 23:50 PM

[10]

嘩哈哈 ; 真心支持 :D
我記得之前你係blogger都有開過架, 而家無左咋嘛。哈哈哈


[引用] | 作者 wythe li | 5th Sep 2010 23:55 PM | [舉報垃圾留言]

blogger試用過,覺得麻麻地好用所以CLOSE咗!

[引用版主回覆] | 作者 麥DON鴻 | 2nd Oct 2010 23:51 PM

[9]

你真係好有heart呀~!!!
我好欣賞你風格~好有親切感~^^
加油呀!!!


[引用] | 作者 becky mak | 5th Sep 2010 02:07 AM | [舉報垃圾留言]

有親切感大家先會睇得投入架嘛!

[引用版主回覆] | 作者 麥DON鴻 | 2nd Oct 2010 23:52 PM

[8]

而家諗起或講起電影blog, 麥don鴻真係喺我腦海的第一位喎. 其他有咩好的電影blog真係諗都諗唔起. 所以你係第一位亦係第101位.


[引用] | 作者 Frederick Lo | 5th Sep 2010 01:02 AM | [舉報垃圾留言]

呵呵.......咁識擦鞋呀!!!

[引用版主回覆] | 作者 麥DON鴻 | 2nd Oct 2010 23:53 PM

[7]

一直都好欣賞Don鴻兄Blog野o既個人風格,以及樂於跟大定分享同電影有關的事情.... 希望你可以長Blog長有!


[引用] | 作者 Andeon | 4th Sep 2010 23:47 PM | [舉報垃圾留言]

我諗我唔死,都仲會繼續BLOG野嘅.....呵呵!!!

[引用版主回覆] | 作者 麥DON鴻 | 2nd Oct 2010 23:54 PM

[6]

Good to know more about you. I hope I have some topics that I would like to keep writing for couple years.


[引用] | 作者 Jessie | 4th Sep 2010 23:22 PM | [舉報垃圾留言]

我會繼續努力架喇!

[引用版主回覆] | 作者 麥DON鴻 | 2nd Oct 2010 23:56 PM

Next