香港新浪網 MySinaBlog
« 上一篇 | 下一篇 »
麥don鴻 | 8th Aug 2010, 11:40 AM | 每DON睇戲時 | (406 Reads)

雖然呢3篇"邵氏射鵰三步曲",已經係07年嘅舊文,雖然我知有部份BLOG友已經睇過N次,但仲依然仲咁捧場留言支持,小弟今舖真係感動到噴晒水.................呵呵!!!

 

入返正題: 今次繼續同大家介紹邵氏射鵰第三步曲 - "射鵰英雄傳第三集"

經過上兩集嘅成功,邵氏隔咗幾年之後,喺1981年終於都出第三集喇! 呢套射鵰好明顯唔係好似魔戒咁,一次過拍晒3集,因為有d演員嘅面口已經變咗好多,不過都仲未走樣嘅..............

今集嘅劇情比較簡單,由楊康跟隨裘千仞上鐵掌山,之後郭靖攞咗武穆遺書同黃蓉俾裘千仞打傷,到去咗黑沼見到瑛姑,再去搵一燈大師都有交代。當然今集嘅主線劇情,就梗係交代段皇爺同瑛姑嘅恩恩怨怨,同交代周伯通同瑛姑之間嘅姦情啦! SORRY.............係感情先啱!!!

因為劇情簡單咗,人物又少撚咗,所以故事推進明顯較慢,第一、二集雖然分別有成117min同110min片長,雖然節奏超明快,但就無咩悶場...............但今集得92min,反而多悶場,主要原因係因為演員少咗,今集無東邪西毒北丐,無全真七子江南七怪,無穆念慈又無傻姑,所以明顯無咁熱鬧同少咗好多支線。今次主線較重係黃蓉、南帝、瑛姑,周伯通同裘千仞只屬配角,咁郭靖呢? 當然由頭跟到尾,不過出場多對白少,佢只係負責喺黃蓉身邊跟出跟入,得閒就吠兩次,好似狗一樣,同間中露兩手打下交咁....................

 

當然梗係唔少得介紹下今集嘅主要角色同精彩道具啦!!!

 

今集主要角色如下(今次認真d介紹下先)

郭靖 - 傅聲

連續2集都有得做黃蓉嘅妞妞,我真係見識少,原來佢係邵氏童星出身,之後去過日本發展,再返香港喺麗的做過一段短時間,77年重簽邵氏5年,第2-3集都係當時力棒期間嘅戲,到而家一d台灣網站都仲有佢一d fans幫佢整下網頁,我估佢當時應該係紅到標水嗰隻...............

第一集已經有介紹狄龍做南帝,不過第三集先真正出場,好明顯係玩巨星壓軸,雖然今集喺戲入面交代佢由南帝做到一燈大師,理應好多戲,但成套戲只有中段合共得13min嘅戲有佢份............下咁撚少嘅! 狄龍話晒都係當年嘅邵氏巨星,如果佢唔係俾面張徹,我諗佢都未必肯客串演出喇!

瑛姑 - 井莉...............如果有睇開邵氏戲嘅BLOG友,都應該知道井莉係乜水,佢當年都好紅架!!!

有時靚仔真係無得講,你哋睇郭追嘅後生老頑童造型同老左有咩分別,我會答無,因為一樣咁靚仔。佢戲入面做後生老頑童,俾我感覺只係一個輕挑嘅仆街無賴,佢完全做唔到老頑童個種天真同傻氣...................傻撚就有

尾段半個鐘佔戲較多嘅漁樵耕讀
由左起:樵 - 鹿峰;耕 - 王力;讀 - 孫建; 漁 - 江生...............唔知呢班係乜水? 唔緊要..............小弟往後將會介紹更多,由呢班張徹大隻契仔有份擔正嘅戲,到時大家對佢哋熟識嘅程度,將會好似同自己嘅親人一樣.................

鐵掌幫幫主裘千仞 - 羅莽............隔離嗰位係................佢咪楊康羅........吓...............上兩集嗰個李藝民呢? 咁呢個演員叫咩名呀! 佢可能太低調喇! 低調到邵氏都唔知佢叫咩名,所以無介紹...........佢其實叫余太平,佢係張徹云云鴨仔中嘅其中一隻.................SORRY! SORRY!!! 係契仔先啱! 不過有無名都無咩所謂啦! 因為呢個楊康得兩句對白同出場合共得3min,基本上同老臨無咩分別,唔係唔係...................有對白講嗰D叫特約,所以無介紹其實都好正常嘅!!!

 

 

精彩道具/場景設計大公開

今集射鵰無咩特技出現,動作場面設計亦集中喺尾段郭靖大戰裘千仞度,反而今集喺美術道具同佈景設計,就做得比上兩集精細,同大家介紹下啦!!!

武穆遺書 - 明顯比電視台嘅仔細,最少都有一個木盒套住,比起淨係揸住本書,感覺無咁蝕................

瑛姑掛住老頑童,日日挑呢張四張機綉花布,真係挑到自己都變埋4張幾,不過真係好精細,d字真係绣出嚟架!!!

一入到瑛姑屋企一定見到嘅百子圖,留意全部人手寫嘅..................唔係印上去架!!!

瑛姑個私竇.....................喺黑沼中間,遠睇都FEEL到個模型相當仔細.................

先經過上面條機關上山就可以見到一燈大師個竇喇! 邵氏當年D廠景真係好勁,竟然可以搭出有山有水有橋嘅大景,比起而家TVB D所謂豪華景,點解退撚步晒架!?

 

今集精彩內容大公開

今集黃蓉會教大家玩數獨嘅口訣,數獨迷不容錯過

一燈大師絕學一陽指,絕密大公開

一指

再指

仲指

仲指緊(全個療傷過程都篤足成分鐘,黃蓉身上每一寸嘅肌膚都俾一燈大師篤過晒,陰部除外.............)

尾場大戰:郭靖大戰裘千仞

裘千仞先玩到自己出晒汗再用鐵掌功迎戰,隻手咁黑嘅! 痾完屎無洗手呀!? 鐵掌嚟架白痴!!!

郭靖見裘千仞晒料,自己都唔執輸,喪玩幾招降龍十八掌,分別為"Repenting arrogant dragon", "Flying dragon in the heavens", "Dragon fighting in the wild", "Dragon jumping over the depths", "Potential might of hidden dragon",經過咁多DRAGON之後,
裘千仞終於.............

失足跌咗落水,之後.........................呀........................................

之後咪....................邵氏出品 必屬佳品

 

 

 

PS: 其實第三集之後,邵氏都無再拍過射鵰,真係幾無頭無尾下,雖然邵氏唔拍,但第二年即係1982年,無線就開拍射鵰電視劇喇.................不過邵氏其實都拍過唔少金庸名著,小弟往後會再慢慢同大家介紹,由於呢D金庸小說,大家都應該睇到識背,所以小弟喺介紹呢D戲時,只會重點介紹一D人物同佈景,內容就唔會長篇交代喇!!

 

 


[10]

無線拍金庸都拍到爛啦, 我仲記得陳小春嗰套鹿鼎記...唉


[引用] | 作者 Sarah | 27th Aug 2010 21:56 PM | [舉報垃圾留言]

陳小春嗰套"鹿鼎記",真係唔知拍嚟做乜? 不過當年陳小春都算有D人氣,都總有人睇嘅。

[引用版主回覆] | 作者 麥DON鴻 | 28th Aug 2010 19:15 PM

[9] 郭追

DON鴻,我岩岩睇完套城市特警都有郭追做…反而套戲幾好睇WO=]


[引用] | 作者 鴻少 | 10th Aug 2010 05:23 AM | [舉報垃圾留言]

其實郭追到咗80年代中轉咗動作指導之後,真係令好多人都唔知佢以前做過咁多主角,我都係睇返以前D戲先知佢咁紅。

[引用版主回覆] | 作者 麥DON鴻 | 13th Aug 2010 21:29 PM

[8]

今次楊康個樣冇咁似人妖.


[引用] | 作者 Andeon | 9th Aug 2010 14:00 PM | [舉報垃圾留言]

雖然唔人妖,不過呢個楊康就勁矮喇!

[引用版主回覆] | 作者 麥DON鴻 | 13th Aug 2010 22:07 PM

[7]

麥blog主(勿扑主??),

你上面話有鴨仔, 意思係張大導係基民?
還是一班中女想食鴨呀?


[引用] | 作者 winglass | 9th Aug 2010 08:54 AM | [舉報垃圾留言]

嗱!!!先旨聲明,我從未正面講過張大導係基民,係你個人意見咋!!!我哋去跟旅行團都叫鴨仔團啦!唔同我哋又係去做鴨咩!?我話佢係鴨仔嘅意思,係話佢跟張大導搵食咁解,至於張大導係咪同志雲大師係咪一樣係同類,就自己慢慢諗下喇!!!

[引用版主回覆] | 作者 麥DON鴻 | 9th Aug 2010 11:41 AM

[6]

換了角的楊康依然恐怖,佈景道具真的是很厲害的,但劇情還真是很難令人接受。


[引用] | 作者 Calvin Chiang | 8th Aug 2010 23:08 PM | [舉報垃圾留言]

其實邵氏改篇嘅金庸,比TVB果D改得仲犀利,真係唔當金庸名著睇,會睇得順氣D

[引用版主回覆] | 作者 麥DON鴻 | 13th Aug 2010 22:10 PM

[5]

嘩!都好草草收場 WOR。
不過真係頂唔住楊康個造型,完咗都係好事!


[引用] | 作者 Milky Lee | 8th Aug 2010 19:26 PM | [舉報垃圾留言]

其實張徹由70年代尾開始,D戲入面既演員造型都非常之"奇特",有D仲真係基味十足,同不堪入目,呢個才康算靚仔架喇!

[引用版主回覆] | 作者 麥DON鴻 | 13th Aug 2010 22:13 PM

[4]

無辦法,電視可以舖排劇情,電影永遠搞到七零八落、斷蕨禾蟲。

i-Joel
[引用] | 作者 i-Joel | 8th Aug 2010 18:11 PM | [舉報垃圾留言]

不過只要好睇,其實唔跟原著都無所謂嘅

[引用版主回覆] | 作者 麥DON鴻 | 13th Aug 2010 22:15 PM

[3]

裘千仞個造型超正


[引用] | 作者 Paul Ip | 8th Aug 2010 17:40 PM | [舉報垃圾留言]

10個正

[引用版主回覆] | 作者 麥DON鴻 | 13th Aug 2010 22:23 PM

[2]

邵氏再拍第四集都恐怕無能為力, 傅聲拍完呢套後都差唔多RIP了.


[引用] | 作者 Louis Lin | 8th Aug 2010 13:27 PM | [舉報垃圾留言]

其實就算傅聲無死,再拍第4集都唔會好睇,因為第三集已經開始好多悶場出現,唔拍都係好事。

[引用版主回覆] | 作者 麥DON鴻 | 13th Aug 2010 22:21 PM

[1]

裘千仞咁就死左=.=

劇情拿西D, 不過道具係唔錯


[引用] | 作者 waiwan | 8th Aug 2010 12:08 PM | [舉報垃圾留言]

當年張徹真係勁捧羅莽,所以裘千仞呢個角色都霸咗兩集,可見張徹愛佢有幾深。

[引用版主回覆] | 作者 麥DON鴻 | 13th Aug 2010 22:18 PM