香港新浪網 MySinaBlog
« 上一篇 | 下一篇 »
麥don鴻 | 3rd Aug 2010, 12:45 PM | 每DON睇戲時 | (424 Reads)

上集有好多BLOG友可能睇唔慣,小弟只用文字去交代故事,D劇照放少咗,其實呢3篇"射鵰"由於係舊文嘅關係,風格上當然同大家睇小弟近年嘅新文章有好大分 別(呢3篇文章已經係07年架喇),上集有BLOG友留言話我YBLOG寫得好笑同好睇D,根本小弟呢D舊POST都只係作出少量字眼修改,只有一少部份 係重新再寫,所以根本可以講唔會有太大分別,同埋小弟一向都係用曲線方法去介紹電影,用字粗鄙只係想大家易睇同易接受一D,因為始終介紹舊戲,未必對所有 人都有吸引力,所以粗鄙無聊只係手法,大家如果可以細心D睇,其實已經帶出咗一D資訊出嚟,希望大家以後可以用心D睇小弟嘅粗鄙電影介紹................感謝各位!!!

 

入返正題: 今次繼續同大家介紹邵氏射鵰第二步曲 - "射鵰英雄傳續集"

1977年邵氏射鵰英雄傳第一步曲反應唔錯,1978年第二步曲繼續獻世,呢集嘅節奏同樣明快,不過今次交代劇情就比較清楚,唔會只用幾分鐘去交代,算係睇得舒服流暢。喺動作方面今次比較少硬橋硬馬拳拳實的的嘅武打場面出現,轉為有功夫招式同動作設計,今集亦用咗少量動畫特技同燈光技巧去交代運功出招情況,對張徹嚟講算係好撚大突破架喇!!!

第二部曲故事方面,主要係由郭靖、洪七公同老頑童因撞船去咗荒島,西毒用黃蓉迫郭靖默寫九陰真經開始,之後洪七公俾西毒暗算;一行人偷入去皇宮食御饍;完顏洪烈、西毒、楊康入皇宮偷武穆遺書;郭靖同黃蓉密室療傷;梅超風俾歐陽峰殺死;歐陽克點樣跛腳都被楊康殺死都有交代;當然今集主線就係黃蓉點樣成為丐幫幫主嘅經過啦!

 

今集仍然未見南帝出現,不過就出現咗傻姑、陸冠英、程大小姐、丐幫仝人、全真七子同鐵掌幫幫主裘千仞,所以郭靖、老頑童、洪七公今次只屬配角,戲份較重係黃蓉、東邪西毒同楊康,仲有今集好多要角都嚟個大換血,大家睇完就知個變化有幾震撼喇!!!

今次會分兩組,分別為"一成不變組""變種ON9組"

 

一成不變

主角當然不變啦! 都仲係傅聲..................

人妖楊康.照舊濃妝....................YEAH!!!

今集都仲係顧冠忠做東邪,大家睇下上圖個東邪個鼻哥窿撐到幾撚大,呢D咪叫霸氣囉!!!

"霉"超風套戲上集著到今集....................一樣都仲係咁撚霉

郭追武功好就全球華人都知,睇下佢採礦採得幾咁深入,少d功夫底都做唔撚到..............郭追好野!!!

我仲係盲架.........................

 

其他主要演員都不變,包括: 西毒 - 王龍威;歐陽克 - 李修賢;北丐 - 谷峰;于榮 - 完顏洪烈;惠英紅 - 穆念慈都仲維持有得do。不過有d演員變化就好撚大,有d做上集死撚咗,今集做變咗做第二個角色,有d主要角色直情換埋人,有d造型真係求其到嚇撚死你,跟住同介紹嘅就係變種ON9組...............

 

變種ON9組 (右上圖為上集演此角色嘅演員)

今集黃蓉已經唔係恬妞姐做喇! 轉咗由妞妞(相信一D"老友記",一定知妞妞係乜水,不過由於我係90後嘅關係,所以當然唔識佢啦),佢扮黃蓉都算演得出聰明機智同悄嘅,最少塊面都無咁爆先啦! 同埋妞妞由面同身型都索過恬妞姐好撚多...................

今集隱撚藏劇情係講梁子翁因腹蛇嘅死導致意志消沉,所以越嚟越瘦,最後連樣都變撚埋...............換人唔緊要,造型都唔好咁撚求其好喎!

呢條死魚眼仁兄係邊位呢!? 俾三個答案大家估下: 1. 爾冬陞    2. 唐季禮    3. 蕭玉龍.............睇下你哋估唔估得中喇!?

江湖傳聞全真七子每個都有玩下D長生不老但照舊會死嘅獨門功夫,所以佢哋會越嚟越後生,個個好似患晒不老症一樣..................上集嘅丘處機已經算後生,今集搵徐少強做丘處機仲後生,呢套應該係徐少強成為大俠前嘅試金石....................我講得咁好聽,其實佢喺呢套戲入面只係閒中閒嘅閒角...................

羅莽今集真係吐氣揚眉喇! 唔使做韓寶駒得一句對白,升"呢"做裘千仞,可以講戲份同武打場面都算俾盡佢發揮架喇!

今集加入咗傻姑,係由邵音音飾演嘅,音音姐嘅演技真係出撚神入化,扮傻姑就永遠只有3個表情,你可能會話咁"行"都話好戲,上圖由左至右順次序將呢幾個表情,每次一有佢出場,就不停重複做19幾或次以上,真係扮到面都抽撚晒筋架! 音音姐好嘢....................

吓! 楊鐵心唔係上集死撚咗咩! 今集又出現,今次狄威係做丐幫長老乙,佢可能都驚大家忘記佢,所以今次依舊都要除晒衫玩到出晒汗,等D基民開心下..................

有楊鐵心又點會無郭嘯天呢? 今集演員唐炎燦做全真七子之一譚處端,戲份超重,如果無佢挑逗梅超風同佢打,全真七子就唔會晒料出天罡北斗陣,譚處端最尾收場係點................咪過身囉!!!

 

今集"強勁"特技 / 動作場面設計大公開

西毒撞鬼呀! 塊面咁撚綠嘅? 喺今集當西毒運功就會出現呢d燈光特效,雖然係好似流咗少少,不過上集係無呢D燈光特效,算係有進步架喇!

全真七子最勁嘅天罡北斗陣,亦用咗0.1%嘅動畫鏡頭交代北斗星位置。動作場面設計方面,係呢個陣法嘅場面設計都算有心思,至於似唔似原著,你有睇過小說咪知似唔似囉!!!

呢個合共足36秒嘅動畫鏡頭,係交代郭靖望天,領悟出北斗七星轉移星位嘅鏡頭,以張徹當時D戲嚟講,算係好突破同進步架喇! 雖然呢段動畫製作就簡陋咗D,但肯求變始終都係好事..............

 

 

 

 

PS: 第一、二部曲大家都睇過喇! 唔知大家對呢套陳年射鵰又有無興趣想睇返呢? 下回將會最後分解邵氏射鵰英雄傳3步曲 - 最終回第三步曲


[12]

傻姑應係余莎莉?


[引用] | 作者 tachibana | 16th Jan 2011 20:56 PM | [舉報垃圾留言]

[11]

Good work!


[引用] | 作者 kloceanic | 18th Dec 2010 12:36 PM | [舉報垃圾留言]

[10]

其實以個時的待技技術係畫到咁上下啦~同期的外國片都好唔到幾多~


[引用] | 作者 Sarah | 27th Aug 2010 22:05 PM | [舉報垃圾留言]

同期嘅西片,咪就係"星戰"囉!!!當年邵氏見"星戰"D激光動畫受歡迎,就即引入呢種技術入邵氏,嗰種積極比起而家D香港電影人進取得多。

[引用版主回覆] | 作者 麥DON鴻 | 28th Aug 2010 18:53 PM

[9]

雖然冇詳細介紹劇情,但以2集人物o既比較來寫呢篇文,同樣精彩....

另外,o的特技效果好似唔錯咁喎..


[引用] | 作者 Andeon | 9th Aug 2010 13:46 PM | [舉報垃圾留言]

其實唔介紹劇情,係因為大家都應該熟晒"射鵰",唔使多介紹喇! 同埋呢套"射鵰"講人物造型同場景仲多野寫過劇情。

[引用版主回覆] | 作者 麥DON鴻 | 13th Aug 2010 21:09 PM

[8]

死魚眼嗰位仁兄係好似: 唐季禮~~haha


[引用] | 作者 Mandylai | 4th Aug 2010 20:49 PM | [舉報垃圾留言]

錯....係"燒肉龍"先啱!!!

[引用版主回覆] | 作者 麥DON鴻 | 13th Aug 2010 21:12 PM

[7]

北斗七星原來只需36秒就可以轉移星位 :)


[引用] | 作者 Paul Ip | 3rd Aug 2010 12:50 PM | [舉報垃圾留言]

36秒都算耐架喇

[引用版主回覆] | 作者 麥DON鴻 | 13th Aug 2010 21:13 PM

[6]

做王處一果個係咪唐季禮?

我2000後, 唔係好認得.


[引用] | 作者 Louis Lin | 3rd Aug 2010 05:57 AM | [舉報垃圾留言]

錯....係"燒肉龍"先啱!!!

[引用版主回覆] | 作者 麥DON鴻 | 13th Aug 2010 21:13 PM

[5]

新黃蓉比較靚女,仲有 D 鬼鬼地,唔知演技點呢?

楊康個造型做咩好似賈寶玉咁?


[引用] | 作者 Milky Lee | 1st Aug 2010 20:15 PM | [舉報垃圾留言]

其實新黃蓉妞妞,好似當年都同張國榮一齊拍過D麗的電視劇,唔知有無記錯,演技就一般啦!不過一定正括妞....呵呵!!!

[引用版主回覆] | 作者 麥DON鴻 | 1st Aug 2010 20:24 PM

[4]

還有老頑童仍然是這樣啊,不過挖礦那張竟然比造型那張好看一點,哈。


[引用] | 作者 Calvin Chiang | 1st Aug 2010 15:31 PM | [舉報垃圾留言]

其實郭追當年同鹿峰、羅莽、江生、孫建好受張徹力捧(力捧代表作有:"五毒"、"殘缺"、"叉手"等...),所以就算明知造型夾硬都一定要佢呢班新張家型契仔,擔演一定重要角色,觀眾未必接受,但最緊要張徹可以睇佢哋玩咩都玩到出晒汗就心滿意足喇!呵呵!!!

[引用版主回覆] | 作者 麥DON鴻 | 1st Aug 2010 20:29 PM

[3]

我的天,人妖楊康竟然沒換角,不過黃蓉比上集又真的好看了不少。而且七十年代末期的電影有這樣的動畫效果已經很厲害了,北斗七星陣還有點像早期的電腦rpg遊戲的效果呢。


[引用] | 作者 Calvin Chiang | 1st Aug 2010 15:29 PM | [舉報垃圾留言]

其實77年已經有"Star Wars",所以有電腦動畫出現一D都唔出奇。

[引用版主回覆] | 作者 麥DON鴻 | 13th Aug 2010 21:16 PM

Next