香港新浪網 MySinaBlog
« 上一篇 | 下一篇 »
麥don鴻 | 17th Jul 2010, 23:55 PM | 每DON睇碟時 | (540 Reads)

大家睇到個標題,可能會諗講周星馳d咩唔值租!? 既然喺得"每don睇碟時"度講得嘅..............就梗係講碟啦!

相信周星馳d戲,好多人都睇過,包括佢未紅時嘅星仔作品,到星爺時期嘅作品,相信大家都有睇過或者收藏晒周生所有嘅作品。今次我就會介紹兩套周星馳兩套電影vcd,就係"回魂夜"同"破壞之王",點解一定要介紹呢兩套,除咗因為碟面嘅彩圖吸引之外。當然就梗係要講下呢兩隻碟以前嘅風光史啦!!!

"回魂夜"同"破壞之王",呢兩套戲之前天映都出返晒vcd同dvd,就應該全球華人都知喇! 不過喺天映未拎到版權翻出之前,就只有美亞出過呢兩套戲嘅vcd同dvd,但由於時間耐咗d貨亦開始買少見少,加埋版權又約滿咗嘅情況之下。呢套戲就開始絕絕地,同成為炒家嘅必炒品喇!!! "破壞之王"嘅美亞彩圖版vcd,曾經都俾人炒過$200以上,dvd就更加曾經炒到$350以上。另外,"回魂夜"嘅vcd彩圖版亦曾經俾人炒到$250隻,平裝版都值$80....................不過呢d已經係曾經嘅事,而家翻出返,呢兩套戲當然無人會再炒喇!!! 但坊間有d舖頭仲有放出嚟賣,幾十蚊就有交易,有興趣想擁有下.................都可以買嚟回味同感受下呢兩套曾經俾人捧過上天嘅炒品,究竟有咩咁巴撚閉!?

其實仲有"濟公"同"師兄撞鬼"都曾經貴過下,不過價錢都係$80-120左右,唔算好貴之餘仲有價無市,市場對呢兩套嘢反應一般,就算絕咗都唔可惜,不過係周生fans嘅就應該貴一貴都會買嚟擺下嘅!!! 點解呢4套戲版權,點解會同時落喺專出邵氏戲嘅天映手上,其實唔係太多人知,呢4套戲其實都係大都會電影公司出品,間公司嘅老細就係方逸華,相信方逸華同邵氏嘅關係...............相信都唔使我再詳細講大家都明點解d版權會落喺天映手啦!!!

 

好.............講完一大輪嘢係時候重溫返個"碟"樣喇!!!

呢兩隻一樣都係"破壞之王",內容完全一樣,不過碟面就有分別喇!!! 但大家齋睇盒面,唔係有炒賣習慣嘅BLOG友,應該唔太知箇中分別。分別就係有林國斌嘅係彩圖版,曾經要成2舊幾水一隻,有鍾麗緹嘅係平裝版幾十蚊嘅cheap嘢!!!

A碟面有曾經係志雲大師愛將嘅梁榮忠,雖然美亞以前嘅彩圖碟碟面印刷質素較好,不過有時都會有碟面太暗同顏色太淺嘅情況出現,好似呢款彩圖版就明顯印得深得滯.............灰灰暗暗咁,盒紙亦無咩設計可言,睇下D爆炸圖案幾咁爆炸就知啦!!!

B碟面就係"人人有功練".................相信呢幕大家多多少都總有D印象嘅!!!

"破壞之王" - 平裝版,呢款平裝版比起慳成本嘅單色圖案版更慳皮,連基本設計都無。另外,"回魂夜"嘅平裝版同呢款亦係一樣嘅!!!

"回魂夜"盒面,好老實其實小弟對呢套戲感覺麻麻,對周生嘅造型亦唔太LIKE,不過比起周生嘅"少林足球"、"功夫"同"長江七號"比較,呢套就真係好睇好多,最少都有得笑下先啦!!!

A碟面嘅圖案同盒面一樣,碟面採用4色滑面印製,顏色光度同鮮艷度都配合得幾好,質素亦算唔錯,難怪以前佢嘅炒賣價錢一直偏高, 最少印刷質素都好"破壞之王"少少先啦!!!

B碟面就係周星馳同莫文蔚大玩"這個殺手不太冷"嘅造型劇照

 

 

其實周星馳所有嘅戲都出過晒VCD同DVD咁滯,不過印象中有兩套戲係而家比較少見到嘅...........就係"義膽群英"同"漫畫威龍"。"義膽群英"周星馳只係參演其中一角,並唔係主要角色,加上角色有無搞笑成份,所以套戲就算只出過錄影帶,喺本港並無發行商出過碟,都無咩人有心去特別留意,更何況炒賣。

仲有一隻就係"漫畫威龍"..............................

"漫畫威龍"其實係"新精武門1991"嘅續集,相信好多人都知,電視亦有間中重播過。呢兩套戲之前星光都有出過碟。但之後轉到美亞翻出,就一直只出過"新精武門1991",身為續集嘅"漫畫威龍"竟然一直都無出過變成絕版...................究竟點解會無翻出? 個版權又去咗邊? 真係連我都唔諗知喇!!!

"新精武門1991"嘅碟面採用4色滑面印刷,不過顏色偏淺。A碟面圖案同盒面一樣,不過B碟面竟然係周星馳用腳插鍾鎮濤對眼,點解要用呢張劇照做COVER,又唔係影得靚? 唔通design個位仁兄,覺得呢張劇照好笑............好笑過套戲.............嘩!!! 好好笑呀!!!

由於"新精武門1991"美亞都已經翻出過幾次碟,所以呢隻星光彩圖版,而家都只係值$20-30左右。

"漫畫威龍"嘅碟面採用4色"鞋"面粗網點印刷,雖然"鞋"面同粗網,不過顏色就靚好多,d色好足夠鮮。A碟面嘅周星馳Q版插畫圖案,同盒面都係一樣,但放嘅位置明顯有心思,最少預返d位放下字。但d導演同演員名,使唔使盒面碟面都放齊呀!!! 驚死人唔知套戲係邊個做咩!!!

B碟面就係鍾鎮濤同陳百祥嘅Q版插畫圖案,其實呢D圖案來源喺嚟自電影poster,都係照樣放返落去碟面,不過其實要放得好睇都唔易,呢隻碟算放得靚架喇!!! 由於"漫畫威龍"暫時仲未有其他發行公司拎到套戲嘅版權翻出碟,所以呢隻"漫畫威龍"嘅vcd都仲有d市場價值,大概$120-150左右...............

吓...............又"漫畫威龍"................呢隻係dvd版,就算以前定而家,市面都算罕見,所以當然又有人炒啦!!! 觀塘某商場嘅2手VCD舖就曾經將佢賣到$298全新..................不過小弟呢隻碟係5年前喺九龍城某vcd舖買嘅,當年入手價$19.................嘻嘻!!! 由於我呢隻碟從未掂過,仲係處嘅關係,大家就無緣睇到佢嘅碟面係點嘅樣喇!!!

 

 

以上資料可能有誤,想知更多詳細資料,就請自行再search

 

 

 

PS: 以上價錢只供參考之用,小弟並無鼓勵他人炒賣之意,始終用幾百蚊買一隻VCD同DVD,值唔值真係好見仁見智喇!

[6] Re : 濟公 VCD

多謝你的介紹, 學到好多野~

請問 知道 最近 濟公 彩圖版 VCD 大概值幾多錢到嗎? 謝謝~~


[引用] | 作者 Terry | 13th Jul 2011 17:51 PM | [舉報垃圾留言]

[5] Re: 麥DON鴻
麥DON鴻 :

其實你都係預幾十啦!因為有供都要有求先起價架嘛!


算把啦, 當童年回憶儲係度, 反正唔值錢又唔阻地方.


[引用] | 作者 Sunny Chan | 19th Jul 2010 12:13 PM | [舉報垃圾留言]

呵呵....咪就係

[引用版主回覆] | 作者 麥DON鴻 | 19th Jul 2010 12:23 PM

[4] Re: 麥DON鴻
麥DON鴻 :

通常書籤同postcard呢類電影宣傳品嘅價值都唔會好高,反而一d立體又或另類少少嘅宣傳品,收藏價值會多d。


我有張"癲佬正傳"宣傳時嘅一張貼額頭探熱但就改做宣傳話"癲佬測試咭", 咁又有無價呢?


[引用] | 作者 Sunny Chan | 19th Jul 2010 11:35 AM | [舉報垃圾留言]

其實你都係預幾十啦!因為有供都要有求先起價架嘛!

[引用版主回覆] | 作者 麥DON鴻 | 19th Jul 2010 11:43 AM

[3] Re: 麥DON鴻
麥DON鴻 :

呵呵......應該值幾十嘅


幾十? 咁我留番先等著草時先放啦, 哈哈哈...


[引用] | 作者 Sunny Chan | 19th Jul 2010 11:00 AM | [舉報垃圾留言]

通常書籤同postcard呢類電影宣傳品嘅價值都唔會好高,反而一d立體又或另類少少嘅宣傳品,收藏價值會多d。

[引用版主回覆] | 作者 麥DON鴻 | 19th Jul 2010 11:09 AM

[2]

我唔知點解低能地儲咗張"新精武門1991"宣傳書簽, 咁值唔值錢嫁?


[引用] | 作者 Sunny Chan | 19th Jul 2010 10:32 AM | [舉報垃圾留言]

呵呵......應該值幾十嘅

[引用版主回覆] | 作者 麥DON鴻 | 19th Jul 2010 10:45 AM

[1]

最可惜既係,《賭俠2之上海灘賭聖》台灣版真係會變成絕版!
因當年兩岸影人未能全面互通,永盛要特別拍套台灣版(女主角換成方季惟,方亦為電影主題曲國粵兩版的歌者),以免鞏俐不能進台而遭受損失。
但今日在台灣,放映鞏版已經習以為常,方版反而消聲匿跡。捧方影迷真正徒呼荷荷!

i-Joel
[引用] | 作者 i-Joel | 18th Jul 2010 11:28 AM | [舉報垃圾留言]

其實你唔講我真係唔知有呢個版本,你嘅留言好有資料性,好有參考作用,歡迎以後再多留有參考性留言...感謝!!!

[引用版主回覆] | 作者 麥DON鴻 | 18th Jul 2010 11:58 AM