香港新浪網 MySinaBlog
« 上一篇 | 下一篇 »
麥don鴻 | 17th Jul 2010, 08:35 AM | 絕對雜睇回憶港產片 | (1868 Reads)

今次要介紹嘅戲,就係1981年嘅香港新浪潮時期電影,黃志強導演嘅"舞廳"。

好多鍾意睇港產片嘅blog友,就算未睇過"舞廳"呢套戲,聽戲名都應該聽唔少,亦有好多人將呢套戲睇成cult片,但事實又係點呢? 好...............唔阻大家睇戲住,睇完再講...............

 

套戲戲名都未打,就先交代戲中3位主線嘅歷史,原來亞飛同亞細係兩兄弟,同韓橫山舅甥關係,講兩兄弟未發育就跟舅父同"不法之徒"對抗,咁韓橫山邊度架..............咁撚串!? SORRY!!! 3人喺故事中並無交代佢哋係唔係有背景,只係交代3人懶正氣多撚事不斷去掃d"不法之徒"嘅場...............咁佢哋一定好撚憎撈偏門喇!? 又SORRY!!! 韓橫山之後同亞細去開舞廳,亞飛就走去開麻雀館..............咁佢哋又算唔算不法之徒呢?.............嚴格嚟講係無呃鳩人同勒索人,同意圖侵佔他人利益嘅情況之下,應該唔算係不法之徒,就算係開舞廳同麻雀館,都可以搞到好似非牟利機構咁嘅............

韓橫山:「我最撚正氣...............絕對唔會用嘢要脅人捉人痛腳咁賤鳩格.............」

亞飛、亞細:「No comment...........No comment!!!」

 

套戲嘅戲名畫頭,小弟都見過有3個版本................

A款係海岸LD版,只有英文戲名"THE CLUB",但就無中文戲名,字體用上白色,同之後打嘅演員導演嘅字色都算MATCH。

B款係富城版VCD,套戲除咗有刪剪之外,連戲名都好趣緻地用上桃紅色,雖然有中文戲名,但感覺就好撚怪喇!!!

C款開頭劇情就無咩特別,同之前小弟放嘅富城同海岸版差唔多。不過分別就喺戲名度,C款係橙黃色霓虹光管中文字,相信呢個表達形式,可能係原裝版本(因為小弟當年無正場睇過套戲,所以暫時亦未有確實答案,只係見過3個唔同版本而已,所以同大家係咁易講下)..............至於點解會有3個唔同版本嘅畫頭,小弟就唔係太清楚喇!!!

故事嘅主線其實主要都係圍繞呢間公主夜總會,由韓橫山先生同細哥喺3年前所開,旨為服務扑友,提供優質嘅性服務,公司各姊妹相處融合樂也融融,好似一家人一樣。韓橫山開呢間CLUB嘅目的,亦只係俾D志同道合嘅扑友,一齊切磋交流,絕對無諗過賺錢,不過公司雖然唔算賺好多,但總有不法之徒對呢間CLUB虎視眈眈。

戲中嘅"不法之徒",其實係指有勢力人士,但亦唔代表一定係黑社會,不過既然無寫明佢哋3舅甥係黑社會會員,咁同佢哋抗衡得嘅,當然唔會係平民百姓(警察除外),所以小弟就假設佢哋係黑社會啦!!!

今日係間CLUB開業3週年...........亞細(陳惠敏)心情勁靚,主動同舅父韓橫山(方野)Cheers祝賀一番!!!

韓橫山同亞細講話老鬼周想買起間廳,不過亞細只覺得對方係"不法之徒"一定有企圖,但舅父山就好想搞大間廳,想搞下24小時經營;連鎖經營;特許經營等等..................總之就搞到間廳又咁大得咁大就very good喇!!! 覺得亞細呢種對"不法之徒"嘅諗法已經out到出水..................但呢個觀念又唔知係邊個仆街灌輸嘅呢???

其實套戲開頭已經交代,呢間公主club因為生意唔錯,所以過幾日就開間新廳嘅老鬼周,想用錢買起韓橫山間club,希望減低威脅性。另一方面,搞開地產嘅華信企業,又突然好有興趣想買呢間廳,所以搞到舅父山心大心細。

唔好睇人傾生意住,睇下間club d女先,呢位係珍妮姐(鄘美寶),佢俾d客迫唱歌令佢非常不滿,不過d客都非常不滿向經理權哥(鄭則仕)投訴。其實珍妮小姐專長係吹蕭,所以對唱歌根本就唔多"乃".........................

喺眾目睽睽之下當眾吹蕭,始終都會有面斥不雅嘅情況出現,所以就算唔"乃"唱歌,都要扮"乃"...............所以就唱咗呢首"一醉解千愁",等大家聽穿耳膜。

呢首歌當然唔係鄺美寶唱啦!!! 原唱者係仙杜拉..............當唱緊歌期間就影下公司內各舞小姐嘅工作情況,簡單就交代咗間廳有幾多舞小姐喇!!! 戲中描寫舞小姐嘅情節,只有開頭幾分鐘略有交代,往後並無任何再深刻嘅描寫。

好................聽完歌又返到嚟交易現場喇!!! 舅父山同老鬼周(佟林)開始傾生意喇!!!

韓橫山:「周縮................周縮................請隨便...........周縮................」

老鬼周:「好似我後生過你架喎................」

其實老鬼周都好開門見山講,怕佢自己間club一開,驚舅父山間club會即時摺埋,所以先出價買起間club(其實情況當然係相反啦),不過舅父山就好撚串講幾多錢都唔志在,因為佢開間club嘅目的,只係俾d兄弟落腳並唔係諗住賺錢,此話一出,即時俾老鬼周頭馬范焦雄(高飛)笑到面青................

韓橫山:「我開間club都係俾d扑友聚下舊..............賺蝕都無諗所謂..............」

范焦雄:「幾百萬開間club俾扑友聚舊..............on9仔」

生意始終傾唔成,不過老鬼周心中對燈火講,一定要喺自己間廳開之前,一定要買起舅父山間club,如果唔係佢間club就"聽"摺都得喇!!!

戲中交代老鬼周同范焦雄,其實就係佢哋3舅甥都好撚憎嘅"不法之徒",即係有意圖侵佔他人地盤,即係惡性掃場或者惡性吞併嘅意思。但佢哋其實並唔係強搶(暫時),係用錢去收購.............咁又何來不法呢?

其實珍妮本來喺范焦雄間club度做,只不過跳槽過咗公主做咁解,本來同佢一齊過檔仲有日本妹美子,不過由於美子之前借咗范焦雄錢,所以就算還完錢都話仲爭錢,仲扣留埋美子嘅passport等佢無得走,珍妮希望亞細可以幫拖同美子出氣兼拎返本passport...............其實范焦雄咁做,係想老鬼周間club開張時有皇牌喺手,因為珍妮姐過咗檔,令到佢個場少咗張皇牌,如果連美子都走埋,老鬼周間club就真係唔撚使開喇!!!

珍妮:「細哥.................你幫美子出頭同范焦雄講數啦!!!」

亞細:「點解要係我呢? 」

珍妮:「你同日本人關係良好嘛..............你唔出面邊個出面喎!?」

亞細:「我同山口組好似熟d喎................ 」

珍妮、權哥:「嘩......................」

臨收工期間,亞飛及時趕到,雖然佢自立門戶開雀館,無幫到舅父同細佬手,不過都無影響到佢哋3舅甥之間嘅感情,仲一齊去大排檔eat嘢添..............究竟邊個有皇牌喺手? 同有咩玩呢?

嘩..................紋身呀!!! 究竟亞細由尋晚食完飯到朝頭早起身佢會做d咩呢?

點解佢會有咁多"架撐",同埋用嚟做咩呢? 嘩!!! D"架撐"同玩GTA嗰d差唔多喎!!!

想睇亞細朝早起身會做d咩!? 同佢拎齊"架撐"做乜? 想知................睇碟啦!!!

因為之前華信企業老細華叔(林偉棋),派嚟d人同舅父山傾唔啱價錢,所以舅父山要求直接同華叔傾,究竟佢憑咩要人公司股權同入董事局? 同埋邊個係泥湫強呢?

亞飛、亞細:「嘩..................舅父你企圖侵佔他人利益,你個"不法之徙"冚家剷.................」

韓橫山:「我只係希望可以將間廳快D起錨啫................有晒路線圖架喇!!! 其實都唔算咩要脅,只係一個好普通嘅合作計劃啫!!!」

亞飛、亞細:「妖.................正一禮義廉................」

原來老鬼周同華叔係一黨嘅......................

亞細終於都搵上門,同范焦雄好"善意"地要求佢交返美子嘅passport出嚟!!!

舅父山夜晚突然標童話要去傾生意,希望亞細陪佢一齊去,究竟會發生d咩事呢?

舅父山開到聲叫亞細陪佢去見客,點知平時好似旺財咁跟出跟入嘅亞細,突然好有事業心咁話要睇住間廳...............舅父山聽佢咁講都無勉強佢,只係叫亞權將d數簿同重要文件交俾王律師,照咁睇生意好似傾得成喎!!!

韓橫山:「亞細...............我約咗人去傾嘢............你陪埋我去啦!!!」

亞細:「我夜D同珍妮都有個打樁工程要傾唔得閒................舅父你安心去啦!」

舅父山一走,亞細俾珍妮用0.5成功力挑逗幾下,亞細就即係話要同珍妮出去兜個Round..............

珍妮:「細哥.................又話傾工程..................」

亞細:「好..................立刻」

打樁工程進行中.....................當亞細插得好入期間,舅父山同樣都一樣俾人插得好入......................

各位手上持有富城版"舞廳"vcd嘅blog友,係咪睇到隻碟花晒都無呢幕呢?

韓橫山:「.................呀.................唔止好入仲好多血呀................點解香港成日都咁多工程咁...........亞細又打樁...........出面又成日整路...............呀!..................有無藥水膠............布..........呀!!!」

亞細帶住頭先性興奮嘅心情,去殮房認舅父山條屍....................

亞細:「................舅父....................總之我就唔打樁啦!!!」

其實套戲開頭講到3人懶正氣,不斷同d"不法之徒"作對,點知舅父山為咗搞大間廳嘅生意,竟然捉華叔痛腳,又要華叔公司股權又要入董事局,咁佢自己又咪"不法之徒"。華叔本來只係想佢馬仔老鬼周間廳開張後生意唔使受威脅,所以先同老鬼周同時間一齊收購舅父山間club,扮到好似有兩班唔同嘅人有意收購,希望舅父山盡快賣咗間廳,咁老鬼周間club就少D威脅,都係善意用錢收購.................點知竟然有人用把柄捉自己痛腳,殺人滅口其實都好正路。雖然華叔、老鬼周同范焦雄都唔係好人,不過真正嘅"不法之徒"其實就係韓橫山..................反駁得嚟都幾諷刺!!!

亞細一直都睇老鬼周同范焦雄唔順眼,極度相信一定係佢兩條粉條殺死舅父山,不過亞飛就收到風,可能係華叔做..............叫亞細要冷靜D..............其實3個人都係一黨架啦.................仲分咩彼此呀!!!

其實故事去到呢度,大家千祈唔好再諗亞飛、亞細同韓橫山懶正氣嘅背景同人物設定,因為韓橫山突然變咗"不法之徒"捉人痛腳所以慘死,亞細亞飛為舅父報仇亦好正路,華叔為自保殺人滅口又無不妥.....................各有各理據,但合唔合理就見仁見智,總之劇情唔合情理多反駁已經唔重要,一味見佢哋義無反顧地亙相廝殺先係套戲嘅重點。

亞細吩咐公主夜總會上下各員工: 出入平安

點解珍妮會死? 亞細同美子又發生咗D咩事呢? 想知..................睇碟啦!!!

范焦雄拖行晒馬去掃公主場..................直至對方冚家剷為止...............

仲凶亞飛,如果佢諗住幫拖嘅..............都一樣會冚家剷............

范焦雄掃公主場期間,打到亞權重傷,佢仲爆響口美子住喺邊(戲中交代美子暫時住喺權哥屋企).................

亞細即刻打電話叫美子(宮井えりな),叫佢快D走...................

想睇范焦雄點掃公主場? 想睇美子點樣逃亡? 咁就要睇碟喇!!!

亞細帶美子去搵亞飛,亞飛講成件事華叔先係主謀,仲講佢今晚會去老鬼周間CLUB度剪綵..............亞細一聽到就話今晚一定要劈死個仆街,問亞飛去唔去幫拖,點知亞飛可能真係驚幫拖會冚家剷,所以無諗出聲....................亞細亦嬲到走撚咗!!!

唔怪得知富城會發行"舞廳"呢隻VCD啦!!! 原本間club真係有佢個名架...........呵呵~~

亞細同美子講,跟住佢會好撚危險,叫佢唔好黐生晒........................不過美子都一味死跟................

由於老鬼周間CLUB,其實就開喺華叔嘅地盤世界中心同酒店入面(即係新世界中心),所以亞細決定同美子扮日本遊客混入間酒店落腳先,夜晚先掃場...............咪住? 點扮遊客混入旅行團度呀!? 得半日時間咋喎!? 唔好問我................套戲呢點都無詳細交代過................

亞細同美子一入到房,本來亞細都好正經執"架撐",點知美子突然標童除衫挑逗佢進行打樁工程...............順得人嘅亞細當然義不容辭啦!!!

各位手上持有富城版"舞廳"vcd嘅blog友,係咪又係睇到隻碟花晒都無呢幕呢? 大家睇到呢3張已經好含蓄架喇!!!

點解美子會死?

點解亞飛又會突然出現? 亞細同亞飛最終結局又會係點呢? 唔使諗喇! 快D搵套戲嚟睇啦!!!

 

 

 

 

 

注意: 以下部份內容,只係小弟個人意見,有部份資料喺未經證實,所以只供參考,敬請各位blog友留意!!! 另外,對小弟文筆不滿之BLOG友,不喜可以勿看,但切勿留言作過份抨擊,懇請自律!!!

鍾意呢套戲,唔係like佢有劇情(因為呢套根本就無),係like佢喺血腥暴力場面嘅處理上,達到一定程度上嘅官能刺激,可以講比張徹嘅處理更真實,同接近日本相近類型電影嘅水平,最少喺血槳嘅處理上,感覺真實一D...............小弟亦可以敢講,80年初至85年為止嘅江湖片中,呢套嘅血腥暴力場面算係氣氛營造最好嘅一部,黃志強嘅"另類"拍攝風格及手法,可以講D人話佢係"禽獸導演",小弟絕對認同,雖然比起外國一D血腥暴力cult片,呢套就真係小兒科咗D,但大家要記住.............你睇緊嘅係港產片。

戲中主角陳惠敏,呢套可以講係佢從影而來嘅代表作,雖然陳氏都做過好多套戲嘅男主角,做黑人物嘅次數亦唔少。不過呢套係佢咁多部擔正作品之中,最有感染力同爆炸力嘅一套。因為戲中亞細由幫D舞小姐出頭;俾人追殺都係自己一個搞掂,觀眾覺得佢好打之餘亦覺得合情理,覺得佢真係可以好似葉問咁一打十,因為一場朝早健身戲份,觀眾唔使睇佢打咩功夫,淨係睇佢玩健身時嘅一身充滿爆炸力嘅肌肉,已經FEEL到佢嘅POWER,以後佢單拖劈友唔死都覺得合情合理。呢幕健身場面都影響深遠,之後佢參演嘅多套作品中,都刻意地加上健身戲份,所以影響力都唔細架!!! 可以講套戲,搵陳惠敏做係不二之選,除咗佢本身背景適合做黑人物之外,佢嘅外型再加佢嘅真紋身亦增添角色嘅可信同可觀性...................仲有一樣,就係陳惠敏嘅"日本FEEL",唔知幾時開始,有陳惠敏嘅戲,佢唔係扮日本人就係扮忍者...............仲有劈友唔係用老牛西瓜刀,竟然係東洋劍,雖然感覺有D怪怪地................不過亦出奇地令佢所演嘅黑道人物更特別更深刻。另外,尾場陳惠敏同徐少強揸東洋刀劈友一幕,亦可以算係港產片江湖片中嘅經典場面之一。

有好多人一提起港產cult片,黃志強導演嘅"舞廳"同"打擂台"一定榜上有名,但小弟個人意見覺得,"打擂台"先係真正嘅港產cult片,因為"舞廳"始終係黃氏首部導演作品,戲中雖然已經feel到黃氏係一個cult人,不過佢可能怕變一片導演,所以拍攝上好多位都有小試牛刀之感,未有去到咁盡,觀眾只覺得套戲有血腥暴力,但就並未有其他cult嘢出現,雖然劇情單薄同反駁到得人驚,不過觀眾都仲明佢講咩...................反觀"打擂台",小弟好相信黃導演,可能自以為已經成功掌握到點拍外國式cult片風格,所以就將所有cult嘅元素同所見所學,完全放晒入套戲入面,所以呢套戲拍出嚟真係可以講係港產片中cult到咩咁,因為cult到無觀眾明之餘仲迫到黃導演要轉營妥協走去拍商業片,所以cult片喺香港真係只適宜俾小眾睇,係絕對唔適宜俾導演拍架!!! "打擂台"又幾cult有幾難明? 有幸入到我FB GROUP嘅BLOG友,就可以遲D喺"DON紅劇場"睇到呢套戲喇!!!

大家如果對"舞廳"有興趣想買返嚟睇的話,可能入手就比較困難喇,因為呢套戲絕版多時,要買返都比較貴,大約$180-250左右,荃灣曾經有間2手vcd舖,竟然開價賣6百幾蚊添.............不過富城版嘅vcd係有cut版片長得83min,無cut版係海岸版出嘅LD有成90min,入面足版收錄陳惠敏大戰日本妹同鄺美寶場面(雖然其實無咩特別嘢睇),呢d就算係炒到六百幾蚊嘅富城版vcd都無得睇嘅,所以值唔值就見仁見智喇!!!


[1]

VCD同LD版差左七分鐘???? 我睇過一個版本(好似係來自LD), 有兩節你提過的打樁工程, 但無七分鐘咁長喎!


[引用] | 作者 Frederick Lo | 20th Jul 2010 22:55 PM | [舉報垃圾留言]

我個無CUT版COPY都係LD COPY出嚟,我又睇唔咩有多到喎!你想知咪問下海岸點解囉!呵呵!!!

[引用版主回覆] | 作者 麥DON鴻 | 20th Jul 2010 23:13 PM