香港新浪網 MySinaBlog
« 上一篇 | 下一篇 »
麥don鴻 | 16th Jul 2010, 21:30 PM | 絕對雜睇回憶港產片 | (1114 Reads)
今次要介紹嘅"碟仙",其實係邵氏1980年嘅出品,全片約佔93分鐘。套戲共分兩個單元,分別由楚原同牟敦芾所導演,第一個故事係由楚原導演嘅"陰靈",約佔55分鐘,絕對係失眠人士必備猛片,可以講一睇即瞓得著,絕對無吹水。當然故事詳細講咩!? 就等大家自己租或買返嚟睇就知架喇!!!

第二個就係由"打蛇"同"黑太陽731"大導演,牟敦芾執導嘅"碟仙"全片約佔38分鐘,故事其實就真係簡單到無倫,只係借碟仙大玩另類色情暴力,同懶係同大家講道理咁,其實又係將女性極度矮化,女權主義者就最好唔好睇喇!!!


如果大家睇VCD嘅話,又淨係想睇牟敦芾嘅"碟仙",唔想睇楚原嘅"陰靈",咁一打開盒直入B碟飛幾分鐘就有"碟仙"睇架喇!!!

套戲一開頭已經交代,有4條細路喺人哋啱啱搬走嘅空置單位玩碟仙,仲成功call到碟仙出嚟傾兩咀,點知大廈"實蕉"亞成(詹森)突然走嚟掃場,嚇到d細路標.....................走晒!!! 不過碟仙先生/小姐仲未有人請佢走..................所以.....................

掃完場亞成想搭笠落返樓,就見到王生(沈勞)個女寶麗(廖麗玲),半夜三更抱住個cute到仆晒街嘅bb公仔出街任蕩,根據王生套戲最後形容寶麗,係形容佢好似天使咁清純可愛,所以佢抱住bb公仔呢個行徑,醫學上亦都有記載過,英文學名叫angelababy,中文學名叫"天使拿bb",真係無吹水,佢真係咁做................大家有眼見架!!! 雖然佢個樣一d都唔似天使!?

套戲入面王生同寶麗兩父女,被導演刻意引導大家去估下佢哋兩個究竟係人定鬼,因為寶麗多個眼神表情中,亦好刻意表現自己唔係人,可能係狐仙,如果佢係狐仙..............佢老豆又係乜水呢? 唔通狐仙上咗寶麗身? 呢個謎團到結尾都無交代到,佢哋兩父女係人定鬼,就等大家慢慢諗下喇!!!

返到自己間房,又係悶到出水...............不過亞成都真係膽大過春袋,碟仙顯靈整到隻碟啪啪聲,亞成唔驚之餘,知道佢係狐仙之後................仲搭單叫醒幾個number買六合彩,究竟係邊幾個number呢?

亞成雖然有碟仙幫拖醒幾個number,不過佢又驚碟仙撚化佢,所以只買$2,馬會個女職員竟然話唔受佢注...................不過最後經理都受佢玩...................

買完六合彩,亞成行過夜總會,就俾門口班擬似社團精英份子調戲,笑佢無銀用.....................

跟住去食飯,佢飲多咗兩杯,舖頭d人又驚佢醉咗,無銀找數,即刻叫佢俾完錢即走,總之亞成去到邊都俾人睇唔起同笑佢無銀用.................其實佢都好可憐嘅...............

牟導演差唔多,用咗成15分鐘去交代亞成嘅處境,同交代佢點接觸到碟仙,之後又用11分鐘去玩下咸濕變態凌辱嘢,結局就大概用咗12分鐘去草草收場,睇咁嘅分佈,就知牟導演對變態色情暴力嘅重視程度,想知有幾變態....................睇碟啦!!!

第二朝瞓醒,亞成又同碟仙吹水,問碟仙點解會咁好醒佢幾個number去買六合彩?

碟仙一聽完佢咁講,即刻個碟不停自轉,叫亞成一定要答應佢戒淫、戒賭同戒殺,亞成一聽完話要戒殺,即刻話自己個膽仲細過春袋,絕對無能本事去殺人................佢一講完呢番說話,收音機即報六合彩,亞成買嗰d碟仙number全部中晒.....................得咗!!!

亞成去馬會拎錢,經理話d number咁撚偏都中,就問亞成係邊撚個教佢買嘅................亞成就用以上對白回答佢......................

 

亞成中咗六合彩之後,人生充滿希望,有幾件事仲要即刻走去幹嘅.................包括:

第一件: 搞晒成棟大廈嘅女住客,用無限嘅金錢利誘之下,希望同佢哋幹出過未來,實在非常之有理想,值得欽敬!!!

牟敦芾嘅11分鐘咸嘢開始喇!!! 戲中交代呢棟大廈嘅女住客,唔係雞就係情婦,個個見錢開眼,毫無尊嚴..................絕對有嚴重矮化女性之嫌!!!

第二件: 溝女................戲中講亞成對"天使拿bb"一見鍾情,真係唔結婚,齋洞房已經心滿意足,而家有銀用仲唔學黃曉明咁屌女神咩...................SORRY! 係溝先啱!!!

第三件: 俾錢打人............一百蚊一巴,絕對係有銀人嘅高尚玩意................因為唔係人人俾得起,特別係面對呢班社團精英份子,因為佢哋分分鐘會拖三百幾人晒行馬,等你俾錢打,到時就真係"聽"破撚晒產都得喇!!!

第四件: 俾錢掃人場,五百蚊打爛一樣嘢................絕對有價有市,亞成之前去食飯,笑佢無銀找數間餐廳就慘囉!!!

第五件: 推升女性體能極限,將"蝦妳波凸夾銀紙"呢種體能項目,發揚光大........................

以上11分鐘咸嘢已經播放完畢,要睇足本就梗係睇碟啦!!!

 

亞成有咗錢之後,已經唔記得應承過碟仙d乜嘢喇!!! 不過馬會經理,對亞成用碟仙中六合彩一事信到十足,希望自己都可以中埋一份.........................中風除外!!!

王生突然搵亞成,話要同亞成賭一舖,究竟佢哋賭d咩呢?

點解王生又會用刀"行"住亞成,同搶埋佢d錢走呢?

亞成又點解會死喺d免治肉醬隔離呢? 以上種種問題,大家只要去睇套戲就乜都清楚晒喇!!!

 

 

 

 

 

注意: 以下部份內容,只係小弟個人意見,有部份資料喺未經證實,所以只供參考,敬請各位blog友留意!!! 另外,對小弟文筆不滿之BLOG友,不喜可以勿看,但切勿留言作過份抨擊,懇請自律!!!

 

相信大家睇完介紹,相信一定會問,究竟嗰個王生同寶麗係人定係鬼呢? 點解好似好多反駁之餘仲無頭無尾咁...................我睇完都又咁問自己,不過當醒起套戲係牟敦芾作品之後,就當堂乜都唔使再問,因為牟導演出晒名借題發揮,由'打蛇"借人蛇過橋大玩凌辱色情暴力,到"黑太陽731"借日軍侵華嚟大玩變態暴力................可以講佢根本拍戲主要就唔係同大家講故事,係同大家分享佢嘅變態思維。

有好多人將佢同桂治洪導演拉埋一齊講,覺得佢哋係同類導演。不過小弟個人意見覺得,桂治洪雖然都有玩變態凌辱同色情暴力,不過桂氏喺劇本編寫同拍攝風格上,明顯比牟氏高出幾皮,絕對唔會為暴力而暴力,為色情而色情..............而牟導演就只係掛住玩佢個人覺得好出嘅變態嘢,有時玩得興起,就往往會令個故事就草草收尾。今次故事開頭雖然算有d交代,但到中段交代亞成中六合彩後利慾分心破晒戒,其實又係乘機玩下d咸濕變態嘢,就真係有d過火,加上結尾嘅"節奏明快",就真係有d.....................當然套戲好唔好睇,就等大家自行評分喇!!!

"碟仙"呢套戲當然就無好似"打蛇"未重出前咁難搵,不過要搵全新未開都唔係度度有,建議大家去大型連鎖唱片舖,如:香港唱片同HMV,搵下或者訂貨都仲可能有全新。如果唔介意二手的話,好多二手CD舖都一定有一兩隻"碟仙"喺度,有興趣都可以買嚟睇下,當然租就仲好啦!!! 覺得唔好睇都無咁傷麻...............呵呵~~


[5]

睇碟? 而家呢隻碟想搵仲難過登天...有無可能搵次don鴻劇場放吓佢?


[引用] | 作者 Frederick Lo | 22nd Jul 2010 00:21 AM | [舉報垃圾留言]

[4]

hahaa..蝦妳波凸夾銀紙.. kinda want to see how she can do it!!


[引用] | 作者 christine927 | 19th Jul 2010 11:49 AM | [舉報垃圾留言]

想知?咁就要睇碟喇!

[引用版主回覆] | 作者 麥DON鴻 | 19th Jul 2010 11:59 AM

[3] 道盡性本惡

其實我覺得呢套野係好有教育意義的

tickliu
[引用] | 作者 tickliu | 17th Jul 2010 13:26 PM | [舉報垃圾留言]

咁TICK兄都講得啱嘅...睇戲就雖然覺得有D誇張,但我相信現實都可能會有人咁做

[引用版主回覆] | 作者 麥DON鴻 | 18th Jul 2010 20:09 PM

[2]

我反而想睇下楚原個part有幾撚悶:P


[引用] | 作者 龍五 | 16th Jul 2010 14:16 PM | [舉報垃圾留言]

咁就自己搵嚟睇.....慢慢感受下啦!

[引用版主回覆] | 作者 麥DON鴻 | 16th Jul 2010 14:21 PM

[1]

因為你呢個entry..

我決定買番隻黎睇多次.....


[引用] | 作者 Feheart | 16th Jul 2010 11:36 AM | [舉報垃圾留言]

希望你能夠搵到啦.....呵呵!!!

[引用版主回覆] | 作者 麥DON鴻 | 16th Jul 2010 11:47 AM