香港新浪網 MySinaBlog
« 上一篇 | 下一篇 »
麥don鴻 | 15th Jul 2010, 23:30 PM | 爛片大災難 | (793 Reads)

上回講到..........請睇返"爛片大災難 - 黑獄梟雄(上、中)"

 

江川一島:「杜日雄...............你痾完屎喇嘛..............咁我就係時候要同我個仔報仇喇!!!」

杜日雄:「妖..................你好撚煩呀!!! 你個仔都話係俾嗰個女國際刑警用鎗打死,你要報仇就搵佢,搵我把撚咩!? ................點解你一定要入我先? 你有證據呀!?」

江川一島:「我梗係有證據...............不過我講出嚟.............我驚你驚喎!!!」

杜日雄:「唔怕.............快D講.............唔好阻住我食dinner.............」

江川一島:「其實我個仔之前已經報夢話咗俾我知,係你親手殺佢,佢同我講而家好嬲.............好想搵你落去陪佢傾偈...................我而家就送你一程,你有咩遺言................」

杜日雄:「妖...............江川先生你唔撚係嘛!!! 發夢都咁撚認真!? 係咪你個仔死咗廿九幾年,你都無燒過嘢俾佢,所以佢專登撚返你一鑊呀!!! 我哋中日兩國都唔為個釣魚台打仗,你又何必為咗個夢而咁撚認真呢? 你為咗摷我撚咗成日,同埋阻我住我食dinner..............你知道嘛!!! 我啱啱痾完屎,真係好需要即時補充體力...............你都係認真諗清楚啦!!! 阻人食dinner係死罪嚟架!!!」

江川一島:「關釣魚台咩事!?」

杜日雄:「鬼知!?..................我照劇本讀架咋!!!」

江川一島:「你既然咁肚餓...................我就請你食元寶蠟燭.................受死啦!!!」

 

江川一島:「吓..........................摩記摺機!?..........................」

杜日雄:「哈哈哈......................咁都俾我接到.....................哈哈哈................唔使食元寶蠟燭.....................哈哈哈......................」

江川一島:「你老母..................估唔到全日本都無人接得住我江川嘅刀.............而家你竟然可以安在家中,坐定定用部摺機就接得住我把刀...................實在太利害..............我實在太慚愧喇...................竟然唔可以幫個仔報仇..................」

杜日雄:「仆街.................你想做乜撚嘢呀!!!! 喂..............咪撚喺我間屋度玩切腹呀!!! 要玩返日本先玩......................咪撚阻我食飯呀!!!」

江川一島:「對唔住..............阻你咁耐,我無嘢送俾你,只希望你今餐可以食飽d.................」

杜日雄:「妖.......................我而家好飽喇................唔使加餸.................你...............咪...............切..................呀!!!」

江川一島:「入晒.............................」

杜日雄:「妖...............無情白事多條屍................唔知我打999有無人理呢?」

 

 

戲就做完喇!!! 相信都應該好多人都小晒鬼喇!!! 個結局其實真係幾夾硬,不過相信大家都唔會太介意架喇!!! 因為套戲都由頭夾硬到尾,真係唔爭在啦!!!

 

好...............相信大家都好想知套戲入面嘅舊戲片段,係出自邊套舊港產片?

 

套戲其實就係出自呢套1978年由徐大川導演嘅"交貨",可能大家會問點解小弟咁肯定? 因為小弟喺片段中,都搵到幾樣同poster相似嘅嘢......................

大家睇下陳惠敏呢個動作,同poster入面個動作似唔似?

同poster一樣嘅黃色裇衫黑西裝....................

歐陽佩珊嘅藍色泳衣..............呢段陳惠敏同歐陽佩珊游水嘅戲,因為太無聊,所以小弟就無放圖出嚟....................

poster中嘅直昇機..................其實呢幕直昇機追捕戲都幾長,成14分鐘多d,不過都係影住架直昇機飛嚟飛去,又無咩鎗戰場面,所以其實都幾悶下.................

向華強件有毒衫鈕藍色裇衫,同poster個件一樣嘅...............

大家可能會以為"父報子仇"嘅男主角江川一島係國內演員,其實佢真名叫林澤銘,如果有睇開港產C級爛片嘅BLOG友,一定會覺得佢非常熟口面,佢除咗係演員之外,仲係好多爛片嘅編劇、副導演同導演,佢嘅代表作有"血仍是冷"、"九龍的天空之錯愛馬伕"、"人皮高跟鞋"、"摧花神龍教"、"金枝玉葉之睡在下流社會的日子"等等等...........全部都係低成本到你唔信....................

 

 

 

 

 

注意: 以下部份內容,只係小弟個人意見,有部份資料喺未經證實,所以只供參考,敬請各位blog友留意!!! 另外,對小弟文筆不滿之BLOG友,不喜可以勿看,但切勿留言作過份抨擊,懇請自律!!!

"交貨"原本嘅故事講咩!? 我都唔係好清楚,因為我都未睇過,不過睇d零碎片段都估到8成大概講咩嘅..................其實大家可能會覺得,點解呢套"交貨"嘅片段,會落喺"父報子仇"嘅製作人手上? 小弟就發現,"父報子仇"同"交貨"嘅監製,都係叫韓杰定,只係兩個嘅傑字寫法有出入,"交貨"監製為韓傑定,以"父報子仇"為韓杰定,我覺得有可能係同一個人。因為"父報子仇"既然編劇同導演都打晒名表明同"交貨"唔同,咁監製都可以用另一個名啦!!! 無須用返舊監製個名去魚目混珠,況且呢個監製又唔係出名,所以更加無必要咁做。唯一可以講就係監製係同一個人,而佢手上又可能咁啱有呢套戲嘅拷貝喺手,不過可能因為某d原因,所以唔可以直接用套戲嘅拷貝出vcd,但又有可能有人創意無限,諗到用舊戲中一個人物做主線,開條新線剪埋d舊片拍套新戲,仲可以搵到同一個演員演出,相信如果唔係同一個監製,我諗都未必可以做到咁"巧合"呱!

"父報子仇"呢類剪舊片加新嘢當新戲嘅爛片,喺好多低成本電影中都經常見到,其實係唔太值得介紹又或者大驚小怪,不過由於佢真係搵到鄭麒膺做返同一個角色,所以竟然令成件剪舊片嘅事,真係好似起咗一個回憶作用,雖然好多位剪得都好差,不過呢個構思真係令小弟好驚喜,所以先同大家介紹一下呢套戲.............雖然呢套戲,一D都唔好睇,但我哋亦見到佢哋點樣喺極低嘅成本之下,都無厘頭加場鎗戰戲搏賣埠,都足見佢哋雖然都係呃飯食,但都有野心想套戲多d人睇架!.............你估專登加多場鎗戰戲真係唔使錢咩!?

 

 

 

 

 

 

"黑獄梟雄"(父報子仇)究竟有幾爛? 希望大家今次留言都評下呢套戲嘅災"爛"指數。由於鄭麒膺嘅突然出場,俾到小弟驚喜,所以我俾套戲嘅..............

災"爛"指數: (6個骷髏頭為最高)

本來套戲嘅新劇情,已經爛都咩咁,演員d演技又誇張兼無演技,嗰場搏賣埠鎗戰就更加無厘頭兼夾硬,剪舊片片段d剪接又差.............本來真係爆晒災"爛"指數架喇!!! 6個骷髏頭都嫌少,不過鄭麒膺嘅出場,真係有驚喜之餘,仲唔多唔少救返套戲..................所以就扣一個頭,俾5個災"爛"指數啦!!!


[3]

我估可能係版權問題 唔可以成套戲重出碟 於是就剪成一段段咁當新片賣 當然連舊片名都唔出得啦


[引用] | 作者 Ip | 7th Jul 2011 00:01 AM | [舉報垃圾留言]

[2] Re: 文少

就係想知有幾爛!?

麥DON鴻
[引用] | 作者 麥DON鴻 | 19th Jul 2010 10:43 AM | [舉報垃圾留言]

[1]

呢類戲睇個封面都覺爛啦...

文少
[引用] | 作者 文少 | 19th Jul 2010 09:43 AM | [舉報垃圾留言]

就係想知佢有幾爛!?

[引用版主回覆] | 作者 麥DON鴻 | 19th Jul 2010 10:41 AM