香港新浪網 MySinaBlog
« 上一篇 | 下一篇 »
麥don鴻 | 15th Jul 2010, 22:20 PM | 爛片大災難 | (905 Reads)

同大家係咁易介紹完,"迷你特工隊"同"新七龍珠"兩套台灣爛片同大家打咗底之後,往後小弟同大家介紹嘅爛片,可以講真係大、中、細爛乜都有...............請大家隨時作好心理同生理嘅準備

注意: "爛片大災難"中,小弟介紹嘅所謂爛片,全屬個人感覺,所以有可能同大家心目中嘅爛片有所出入。不過小弟嘅介紹只作個人分享,所以大家亦無須太緊張同作過份抨擊..............敬請留意!!! 

 

呢套標明有陳惠敏同向華強主演嘅"黑獄梟雄",究竟套戲爛喺邊呢? 咁就要大家睇落去先知喇!!!

 

唔阻大家睇戲.................請大家細心欣賞黑............黑..............喂咩戲嚟架!!!

"父報子仇"??? 乜唔係"黑獄梟雄"咩! "黑獄梟雄"只係影碟發行威業,專登撚個假名出嚟"昆"人,套戲其實係叫"父報子仇",其實大家睇下個盒面,喺"黑獄梟雄"個雄字下面都已經有個勁細括號,寫咗"父報子仇"四隻字,不過真係要好好眼先睇到啫!!!

先同大家講一次個故仔講乜春,以下故事大剛來自"黑獄梟雄"VCD盒背...........

二十年前功村的兒子功村三郎,被顧來港為毒販偷運毒品而客死異鄉,三郎托夢告知乃獨眼龍所為,要求替他報仇。功村於是獨自來港找獨眼龍,但得悉他已退隱江湖多時,經過多番轉折,雙方終於爆發一場生死對決。

以上係官方內容,小弟已經一字不漏打返晒出嚟,大家請記住官方內容.............緊記!!!

呢套"父報子仇"係由新海城影片公司出品; 由韓定杰監製; 匡瑞華導演; 韓克定編劇; 陳惠敏、向華強、歐陽佩珊同一班講咗你都唔知係乜水嘅人主演............嗱!!! 真係有陳惠敏.............個名架!!!

一開場就影住呢位長髮亞叔,喺國內某住宅區入面不停穿插,而佢就係陳惠敏..........戲中角色江角三郎(戲中配音員講嘅同盒背有出入)..................嘅爸爸...........江川一島...............吓!!! 爸爸.............有無搞撚錯呀!!!

戲中交代江川一島由日本來港(佢而家身處嘅就係香港...........唔係啩),專情打探一個叫李照龍嘅人...........江川搵呀搵.........搵呀搵...........終於俾佢喺街口見到個鬍鬚亞叔

就係呢位鬍鬚亞叔喇!!! 亞叔一聽見江川搵李照龍,就爆咗一句:「你嚟遲咗一步喇!!!」...................之後鬍鬚亞叔就用個諗樣扮諗嘢!!!

鏡頭一轉,就見到3位年青人,密密傾緊單大嘢.........咩大嘢!!! 咪就係綁架某大有錢佬個仔囉!!! 個有錢佬係邊個? 都無交代............咪有錢佬囉!!!

D有錢人嘅仔女衣著真係非常樸實,班綁匪綁架亦綁得輕鬆自然....................

由於時間關係,綁匪已經綁起咗條參喇!!!

亦由於時間關係,"香港"警方已經好快包圍住把綁匪喇.................大家睇下個"大聲公"幾咁國產.................嘩!!! 個"大聲公"好CUTE呀!!!

綁匪甲:「頭先我開嘅條件,你哋要照做,而家先送D嘢食嚟!!!」

以上為戲中真實對白,其實戲中並無交代綁匪同警方開出咩條件,所以大家千祈唔好問我係咩條件,可能個編劇都覺得觀眾一定會知係咩條件,所以都費撚事同你交代咁多。

由於班綁匪真係好肚餓,所以就不停催促"香港"警方快D送嘢食入去,所以呢位亞SIR就派小光送湯入去,然後叫佢跟手殺埋d賊,叫佢自己執生。

E...........點解有個賊捧餐嘅..............佢做乜撚嘢呀!!! 佢雖然個樣似賊,但佢就係嗰位送湯探員小光,佢對眼好似閉路電視咁左射右射,非常之小心...............

點知綁匪甲驚佢有鎗,所以命令小光又除衫又除褲..................

除完仲叫佢轉個靚圈,肉眼睇過佢真係無鎗,先俾佢繼續捧餐.................

小光繼續捧餐中.....................

點知小光突然之間有鎗,同兇猛嘅綁匪駁火................大家睇下D碗入面真係有嘢架!!! 製作幾認真...................

呢段鎗戰戲,運用咗"張徹吳宇森式慢鏡",不過慢足50倍..................

睡眠不足嘅綁匪...............正在駁火中.....................

嘩.................究竟邊個開鎗開得咁"型"呀!!!

原來係小光...............點解佢好似谷精上腦咁................開鎗啫!!! 唔使咁足戲呀!!!

小光經過一輪駁火,終於都殺晒班綁匪,不過由於谷精上腦激得滯,所以開始有D體力不支好似就嚟香咁..............亞SIR見佢咁嘅勢,即刻叫人送佢走.............呢段戲咁就完咗喇!!! 不過呢段戲,同成套戲一D關連都無,真係純粹加場鎗戰等觀眾開心下。

鏡頭一轉,又返嚟鬍鬚亞叔呢度,亞叔問江川搵李照龍做咩,跟住江川就同鬍鬚亞叔講,想搵李照龍打探一個叫杜日雄嘅人。不過鬍鬚亞叔就話,如果想搵杜日雄就應該去搵秦哲,因為秦哲以前跟過杜日雄,所以一定知佢喺邊................

江川一島:「頭先你未諗嘢之前,話我嚟遲咗一步,咁其實李照龍係咪死咗呢? 你諗咗成8分幾鐘綁架嘢................唔好話俾我知,同李照龍死唔死係完全無關係架..............」

鬍鬚亞叔:「江川先生請冷靜D............1. 我從來無講過李照龍死咗,我只係講:你嚟遲咗一步,亦唔代表我話佢死咗架!!! 你諗多咗喇.............至於李照龍係咪死咗,你問編劇啦!!! 咪撚再問我.................2. 我個腦諗緊嘅嘢.............唔一定同你問嘅嘢相符架!!! 我見有時間咪諗8分幾鐘綁架嘢消磨下時間,之後先再答你問題囉................江川先生你又諗多咗喇!!!」

江川一島:「我妖...............嘥撚晒我D寶貴時間,咁而家點撚樣呀............消磨時間」

鬍鬚亞叔:「我現在轉介你去搵秦哲啦!!!」

江川一島:「妖......................係搵到人先好呀!」

鬍鬚亞叔帶江川轉過街口搵秦哲,點知拍到道門爛都無人應,好在鬍鬚亞叔見到秦哲個仔...............即時問佢老豆去咗邊

秦哲個仔一聽見江川搵杜日雄,就同江川講,話佢老豆同佢講過,話杜日雄已經收咗山兼收埋皮好耐,問佢搵杜日雄做乜春嘢..................

江川諗樣進行中....................

江川一島:「喺.............好耐............好耐............好耐............之前.............................」

呢套戲有個特色,就係D演員一整個諗樣出嚟...............觀眾就知"乃"嘢!!!

江川一島:「話說我個仔,突然出席一個賭局.......................」

秦哲個仔:「咁撚多人................邊個係你個仔呀...............江川先生」

江川一島:「同我差唔多樣嗰個就係喇!!!」

秦哲個仔:「吓!!!..................無撚個似喎!!!」

秦哲個仔:「嘩!!! 條女幾索下..............你老婆呀!!!」

江川一島:「担緊支嘢嗰個就係我個仔江角三郎,同佢出緊火嘅就係歐陽佩珊..............」

秦哲個仔:「妖....................牛頭唔搭馬咀」

秦哲個仔:「嗱..................呢個咪就係杜日雄(獨眼龍)囉!!! 搵到人啦...............我哋收得工未...................」

江川一島:「................原來就係佢..............我要報仇.............我要報仇............咪住!!! 呢個好似係我回憶嚟架喎!!! 咁都算搵到人..............玩鳩我呀!!!」

秦哲個仔:「SOR撚RY囉!!!」

江川一島:「唔知點解我個仔賭賭下錢突然之間同人打交.............」

江川一島:「跟住仲同持牌人楊孝龍打起上嚟.............真係打到出晒汗架!!!」

江川一島:「點知打到高潮就嚟出嘢之際..............楊孝龍突然講句:生命麵包,跟住我個仔竟然講: 九九九.............係人都知生命麵包係配維他奶架嘛!!! 你哋話係唔係先..................」

秦哲個仔、鬍鬚亞叔:「梗係"圍她奶"啦!!!」

生命麵包同九九九,其實係三郎同楊孝龍嘅暗號...............真係有"創意"

江川一島:「我個仔就係楊孝龍請返嚟香港運毒,仲未做嘢就先醒5皮嘢佢去玩,呢D咁嘅老細去邊度搵呀!!! 點知就俾杜日雄害撚死咗.......................嗚嗚嗚!!!」

秦哲個仔:「聽聞你個仔係俾國際刑警害死,唔係俾杜日雄害死架喎!!! 而楊孝龍亦喺你個仔未嚟香港之前,已經報咗臭串俾香港同日本警方知添.........」

大家睇咗幾張舊戲劇照,相信都已經小晒鬼喇!!! 其實成套戲,都係用呢套舊戲片段(套舊戲真正叫咩名!? 小弟最後嗰集會開估...........)穿插成個故事,不過雖然有舊片穿插,但其實都好難講得通,有D仲幾亂下添.....................當然成套戲大家真係見到有陳惠敏、向華強同歐陽佩珊做,不過唔係真身啫!!!

江川一島:「雖然你講我個仔唔係俾杜日雄害死,但我憑咩信你先? 我唔理呀!!! 你快D幫我搵杜日雄出嚟..................唔係套戲埋唔到尾架!!!」

秦哲個仔:「呀......................我突然醒起,原來我老豆已經好耐無同杜日雄聯絡架喇!!! 你不如去搵洪義啦!!! 不過洪義我就唔太熟...............搵鬍鬚佬啦!!! 佢知架!!!」

鬍鬚亞叔:「死仆街仔...............交舊屎俾我..............江川先生.............我現在再轉介你去搵洪義啦!!!」

江川一島:「妖...................又轉介..................」

由於今次洪義住得遠D,要出條巷仔先可以搵到佢,所以就要搭的士喇!!! 高成本架!!!

鬍鬚亞叔:「江川先生,由於我同洪義有牙齒印嘅關係,所以就唔撚陪你上去喇!!! 信我...................今次應該有可能或者唔會再有轉介架喇!!!」

江川一島:「如果再有轉介點先?」

鬍鬚亞叔:「我戲份完晒架喇!!! 關我撚事呀!!!」

鏡頭一轉,見到洪義俾人綁架咗,點解俾人綁咗? 因為佢賭錢輸咗囉!!!

江川上咗樓見到洪義老婆青根暴現,不停話佢老公爭人錢點點點................江川見佢咁撚煩,決定幫手救洪義出嚟......................

江川正在打人中................切勿打擾!!!

洪義終於成功獲救,為報答江川救命之恩,洪義決定將江角三郎點死嘅真相,毫無保留赤裸裸地真情表白俾江川一島聽..................

 

 

 

 

 

 

 

待 續............

 

想知江角三郎係俾邊個害死? 想知江川搵唔搵到杜日雄? 想知就要密切 留意"爛片大災難 - 黑獄梟雄(中)"

 

PS: 如有BLOG友有幸睇過呢套戲,請勿爆響口講晒D內容............. 多謝合作!!!


[1]

好野,又見返探員小光,同埋一眾「諗樣」... :P


[引用] | 作者 Andeon | 17th Jul 2010 22:18 PM | [舉報垃圾留言]

下集仲會出現十三妹添....呵呵!!!

[引用版主回覆] | 作者 麥DON鴻 | 17th Jul 2010 23:14 PM